WILLEMSTAD – Pashèntnan lo keda perhudiká mas largu pa motibu di seramentu di sala di operashon na Sehos. E hòspital ta keda na su punto ku e no tin sufisiente sèn pa tene esaki habrí. Gobièrnu no ta intervení pasobra e ke klaridat promé den e finansanan di hòspital.
Entretantu ta e pashènt ta víktima i e lista di espera di 90 operashon pa siman ta bira ma largu kada siman. Den e temporada di 10 di yüli pa 17 di yüli tabatin 181 operashon planeá. Hòspital mester a kanselá 90 operashon. E siman binidero atrobe lo posponé 100 operashon.
Presidente di e Asosiashon di Spesialista Médiko na Kòrsou (VMSC) Alexander Saleh ta bisa tokante di esaki: “Mi no a tende nada konkreto kon e medida aki ta influenshá e pashèntnan. Pero naturalmente ta keda ingenuo pa pensa ku esaki no ta trese miseria.”
‘Ta keda ingenuo pa pensa ku esaki no ta trese miseria’ – Alexander Saleh, presidente di e Asosiashon di Spesialista Médiko na Kòrsou
E pregunta ta keda pakiko minister di Salubridat Públiko Suzy Camelia-Römer no ta intervení. Pero e ta bisa ku ainda e ta wardando su servisio di inspekshon ku ta investigá e finansanan di hòspital.
“Mi ta wardando e inspektor. Un minister no por tuma medida asin’ asina. P’esei mi a duna e inspektor òrdu pa investigá un ke otro i awe mi ta spera klaridat. A rekurí na SOAB tambe pa sostené e inspektor den e parti finansiero.”
Anteriormente kaba e minister a bisa ku e no ta di akuerdo ku hòspital no ta haña sufisiente sèn. I ku su servisio di inspekshon mester kontrolá esaki promé.
‘Un minister no por tuma medida asin’ asina’ – Suzy Camelia-Römer, minister di Salubridat Públiko
Direktor di hòspital Anthon Casperson ta bisa ku nan ta kolaborá na e investigashon di inspekshon. “E inspektor a pidi diferente dato i Sehos a dun’é tur. Djárason e hòspital a duna inspekshon e di dos raportahe di kontinuashon ku informashon amplio di e fluhonan di sèn. Pa medio di mas komprenshon den e fluhonan finansiero di sèn direktiva di hòspital ke por prueba ta unda e défisitnan finansiero aki ta surgi, unda e bùdjèt ta bai i ku asina e direktiva a tuma un desishon korekto i kontemplá.
Entretantu gobièrnu si a transferí 2.1 mion florin . Ku esaki hòspital por a garantisá entre otro e kuido di su botika, Casperson ta bisa. Pero e no ta sufisiente pa por habri e sala di operashon pa operashon no urgente. Esaki lo keda será un siman mas largu ku e dos simannan ku a anunsiá anteriormente.
Mas problema
I esei no ta e úniko problemanan ku hòspital tin. A para un parti di e kuido terapeutiko temporalmente. I a deliberá ku SVB pa por paga e salarionan di e luna aki.
Segun e direktor esaki awor ta garantisá. “Ta trata di 1100 hende di personal. E hendenan aki mester haña nan salario entre awor i aki dos siman. Pa motibu di e défisitnan un ratu esaki no tabata sigur. Pero a logra di salbaguardiá esaki.”
