ORANJESTAD – A pone e manager di e fundashon FSLMA ku entre otro ta manehá e laboratorio di Horacio Oduber Hospital (labHOH) riba nòn aktif den e investigashon di estafa ku tèst. R.B. lo a manda e tèstnan pa un kompania na Hulanda, pero e kompania ta keda na su adrès di kas na Delft.
Ademas e paptèstnan aki finalmente tabata keda Aruba pa análisis serka patólogo M.L., e tambe ta riba nòn aktif awor. Un fuente anónimo ta bisa ku ta trata di 2600 preparado for di òktober di aña pasá. E hòspital lo mester a paga 19 euro pa kada un, en bes di e 15 florin ku e ta haña di rekompensa pa esaki.
Segun e sindikato di enfermera ABV pa añanan largu tin un ambiente malu na trabou. “Intimidashon di parti di maneho, preshon di trabou haltu pa motibu di falta di personal, un skèdjel di trabou insaludabel”, presidente Gina Maduro ta menta komo keho. Un mayoria di e personal di laboratorio ta serka e sindikato aki.
Maduro ta bisa ku despues di publikashon di e estafa ‘e trahadónan tin aun mas miedu pa habri nan boka, pa miedu di retiru’.
“Nan a hasi pregunta anteriormente kaba tokante e proseso di trabou ku tabata falta serka algun tèst. E tèstnan mester a bai den ènvelòp mésora kaba manda. Nan no tabata haña esaki seif.” Pero nan no tabatin prueba di e abusu te dia e publikashonnan a sali, Maduro ta konta.
Entretantu direktor di e hòspital Ezzard Cilié por lo pronto ta manehá e laboratorio, Maduro ta bisa. Pero e tin krítika tambe riba direktiva í e konseho di supervishon. “Nos a avisá nan hopi tempu kaba. Dia ku na yanüari 2017 a tuma B. den servisio nos a bisa kaba ku e no ta adekuá komo manager.” E sindikato tur luna ta sinta na mesa ku direktiva kaminda ta palabrá tambe keho di personal. “Ta parse mi ku tabata trata di sierto protekshon di hende.”
Ken a deskubrí e estafa?
Nico van der Zee tabata esun promé ku a publiká tokante e asuntu den su kolumna den Amigoe. Su kasá ku ta traha na e fundashon di laboratorio ta ripará e konsekuenshanan di su publikashonnan. Ounke su koleganan ta sosten’é su hefe a intimid’é. Aktualmente e tin un siman sintá na kas.
Entretantu e direktiva di e hòspital (ku ta direktiva di laboratorio tambe) ta mèldu ku despues di un investigashon preliminar i un investigashon di echo, awor ta bini un investigashon forénsiko tambe. Pasobra tin ‘indikashon di un supuesto infrakshon di integridat’. E investigashon ta dirigí riba e departamento di patologia i e tèstnan ku ‘un kompania hulandes’ a hasi.
E fundashon di laboratorio FSLMA for di 2015 ta eksistí komo susesor di e Landslaboratorium den nesesidat ku gobièrnu a deshasi su mes di dje e tempu ei. Landslaboratorium mes anteriormente (2007) a haña mal nòmber pa motibu di un estafa di miónes (10 mion florin) pa kua a kondená tres empleado.