ORANJESTAD – Awa a pasa hariña pa minister di husticia di Aruba despues un otro huymento for di prison KIA diaranson ultimo. E ta bin cu medida pronto, entro otro un castigo adicional pa esunnan cu ta scapa for di prison. Locual ta algo unico den Reino Hulandes.
Minister di husticia Andin Bikker ta splica cu ya e tin e proposito cla pa cambia ley pa regla e castigo extra aki. Pues awor e mester cana su caminda so pa pasa conseho di minister y parlamento pa por implementa. “Esaki por bay hopi lihe.”
E mandatrio ta bisa cu ‘rason principal’ pa e huidanan di e ultimo lunanan ta e estado deplorabel di e prison KIA na San Nicolas. “Aruba mester un prision nobo pa decadanan caba.”
Andin Bikker, minister di husticia
Bikker no ta haya e ponencia husto den e pregunta dicon e mes no a percura pa un prison nobo momento cu el a asumi su funcion como minister na october 2017.
“Bo sa cu mi ta riba dje pa basta tempo caba. Na april mi a manda un carta pa CFT como cu secretario di estado Knops a bisa pa puntra nan pa conseho. Eynan tabatin un poco tardansa. Despues mi a manda un carta cu lo sigui cu e sondeo di mercado y no warda mas riba e conseho di CFT den e fase aki mas como cu mester e sondeo en todo caso pa sa cuanto un prison nobo lo costa y asina sa cuanto mester reserva den nos presupuesto.”
‘Cu e herencia financiero malo aki nos ta haci locual nos por’- Andin Bikker, mnister di Husticia
Siman pasa a cuminsa cu e proceso pa e sondeo. “Bo no por spera cu den 1 aña y ocho luna como minister mi por percura pa un prison nobo mientras e minister anterior (di husticia, Arthur Dowers, red.) tabatin ocho aña pa logra pero no tabata kier un prision nobo”, Bikker ta sigui contesta.
E ta enfatisa cu e financia publico precario a hunga un rol grandi tambe. “Nos a palabra cu Hulanda den e protocol di november 2018 cu nos no por uza PPP pa proyectonan mas te cu december 2021. E gabinete anterior a hipoteca nos pais y awor na 2019 nos mester cuminsa paga bek. Pues cu e herencia financiero malo aki nos ta haci locual nos por.”
Asina no por uza e construccion financiero di PPP, pues cu placa publico y priva, pa yega na un prison nobo. Pero minister Bikker ta bisa cu Aruba por paga un prison na final. Y dentro di 1 aña y mey pa dos aña lo bin un facilidad nobo na Barcadera, e ta priminti.
Prison nobo na Barcadera
Un luga mas central pa motibo tambe di personal. Pasobra esaki tambe ta un motibo dicon cos no ta bayendo bon den KIA. Tin falta di personal y tambe hopi AO, segun e minister.
“Pa hopi hende e luga ta keda leu, y nan mester gasta hopi na gasolin.” Banda di esey aworaki tin hopi mantencion pasobra e prison ta riba un baranca den biento di lama y esey ta causa hopi corosion. E luga nobo lo ta mas proteha for di lama, asina Bikker ta bisa.
Husticia lo tuma otro medida tambe pa descurasha presonan pa huy. Esta lo kier redobla e castigo pa ocho aña pas esunnan cu ta yuda fugitivo sea sconde nan. “Den e ultimo casonan nos a ripara cu e presonan ta haya hopi ayudo di famiya y otronan”, segun Bikker.
Banchi electronico y uzo di coriente
Miguel Schneiders – potret: KPA
Esaki entro otro a sosode den e caso di Miguel Schneiders kende a huy for di e warda di polis na Santa Cruz riba 14 juli. Casi un luna despues nan a gar’e hunto cu cuater otro persona cu a yuda Schneiders scapa for di man di polis.
Husticia tambe ta sondeando compania pa cumpra banchi electronico pa presonan peligroso. Ademas lo cuminsa cu destahonan bou man pa trabou di mantencion di e prison bieu. “ Nos kier hekinan nobo y tambe ta investigando si huridicamente lo ta posibel pa uza coriente riba prikkeldraad.” Asina e minister ta splica nan kier evita cu mas presonan lo huy for di KIA te ora e prison nobo ta keda cla.
E rumannan Ramirez kendenan a huy diaranson ultimo -potret: KPA
E ultimo lunanan cinco preso a scapa di cual cuater for di KIA. Polis a gara tres, e rumannan Ramirez ainda ta fugitivo.