SAN NICOLAS – Pa motibo di e construccion di un hotel nobo na Baby Beach, un gran grupo di comerciante ta sinti cu esaki ta un bon oportunidad pa nan inverti den San Nicolas y e area. Esaki a resulta durante e San Nicolas Business Summit. E ciudad oost di Aruba di baina tin actividad comercial pa hopi añanan caba, siguramente desde e cera di e refineria.

Trece bida, inversion nobo den San Nicolas, esaki ta un tema popular bou politiconan pa decadanan. Specialmente durante temporada di eleccion ora nan kier gana voto den e area ki. Sinembargo no mucho a resulta y mayoria a keda na promesa- y plannan so. Momento cu e refineria a cera su porta shete aña pasa, e situacion a deteriora mas y  companianan ta cerando un tras di otro.

San Nicolas Business Summit – potret: Sharina Henriquez

Despues di diferente intentonan di diferente gobiernonan pa habri un hotel na e costa oost, awor nan si a logra. Fin di e luna aki nan lo pone e prome piedra. Pa comercio local y habitantenan di San Nicolas tambe lo probecha di e desaroyo nobo aki, San Nicolas Business Association a organisa e summit.

‘Nos a ricibi e confirmacion cu no lo bin un centro comercial cerca e hotel’ – Andres Hernandez, San Nicolas Business Association

“Minister a confirma cu no lo bin un centro comercial cerca e hotel. Pues San Nicolas mes ta bira e centro comercial pa e huesped y personal di e hotel”, presidente Andres Hernandez ta bisa.

“No, nos no ta bay haci e mesun fout manera nos a haci na Palm Beach (zona di hotel na costa west, red.) unda a construi centronan comercial cerca e hotelnan y Oranjestad a muri despues”, segun minister Otmar Oduber, kende ta tras di e proyecto di e hotel na San Nicolas/Baby Beach.

Durante e evento nan ta keda ripiti cu e desaroyonan nobo no mester afecta San Nicolas su identico. Esta cu e proyectonan mester refleha e cultura di pariba di brug y cu nan no mester bira masal manera pabou di brug unda tin turismo masal y americanisa. Esaki e minister di asunto economico, Xiomara Ruiz-Maduro, tambe ta enfatisa. “E mester keda un melting pot unda tur cultura y hende ta sinti nan mes bonbini.”

Perfecto pa cultiva marihuana
Mayoria di e proyectonan presenta na e summit, no ta inovativo pa Aruba y ta encera construccion di apartamento, condominio pa turista y horeca. Cual ya hopi tin riba e isla.  Wichard van der Meulen di Rial Aruba One Growers ta un excepcion como su proyecto ta encera e cultivacion di cannabis medicinal riba un scala grandi pa exportacion.

“Nos a scoge pa San Nicolas como eynan tin 250 mil metro cuadra di tereno fi refineria. E subsuelo ta contamina pues nada lo crece pero e tereno si tin un muraya. Esey ta perfecto pa nos 100 mil metro cuadro greenhouse, cultivacion afo y por ta 10 megawatt di solar panel.”

Van der Meulen ta hopi sigur cu su cifranan: e neghoshi lo trece mas di 600 cupo di trabou y mas cu 200 miyon florin den lachi di gobierno na impuesto. Como cu e ta calcula cu nan por exporta marihuana pa un balor total di 500 miyon florin. Y el a cera un acuerdo inicial cu un compania na Canada. “Pa motibo di nos status di LGO (relacion economico special cu Union Europeo) nos no mester paga impuesto pa exporta na Canada.” Esey tin un beneficio enorme e ta splica riba e otro paisnan den region.

Otro encuentro planea
San Nicolas Business Association a expresa cu tur proyecto presenta na e summit, nan mester ta concretisa dentro di seis luna. “Nos tambe a ricibi mas peticion di otro inversionistanan cu kier presenta nan proyectonan”, segun Hernandez. Pa motibo di esey e asociacion a dicidi di organisa un di dos summit pronto.

Por lo menos lo bira hopi mas druk na e parti oost di Aruba. Siguramente si e prognostico di minister Oduber lo bira realidad, esta cu ‘1200 pa 1400 turista pa dia’ lo keiro rond ora e hotel nobo a keda cla.