ORANJESTAD – 52% ta haya cu corupcion na Aruba ta aumentando, asina a sali for di un investigacion extenso di Banco Central Aruba cu a publica e resultadonan awor. Mas corupto nan ta considera politiconan, fundacion Lotto pa Deporte, ministernan cu nan conseheronan, ambtenaarnan di Dimas (organisacion di admision di stranhero), parlamentarionan y periodistanan.
Ya na januari presidente di e Banco Jane Semeleer a divulga resultadonan provisional. Awor e rapport ta definitivo y ta mustra cu 76% di esunnan entrevista ta haya cu corupcion ta un problema grandi riba e isla.
Atrobe e rapport ta mustra e envolvimento di e sector di comercio: 80% ta pensa cu tin relacionnan estrecho entre politiconan y companianan cu ta causa corupcion. 79% ta mira corupcion mas tanto den sector publico y 56% ta haya cu e sistema parlamentario ta contribui na corupcion.
Locual ta remarcabel ta cu nan ta menciona e fundacion Lotto pa Deporte como di dos mas corupto. E minister responsabel Dangui Oduber a entama diferente casonan den corte contra e directiva di e fundacion recientemente, pero a perde nan tur. Awor el a dicidi di lanta un fundacion nobo di lotto.
Combatimento corupcion
E investigacion tambe ta mustra cu mayoria no ta sinti cu gobierno ta haci suficiente pa combati corupcion. Pero hasta mas (72%) ta haya cu husticia ta faya den su persecusion di casonan di corupcion. No obstante e caso Ibis unda casi 40 compania tabata envolvi y unda husticia exitosamente a logra un sentencia di cuater aña contra ex-minister Paul Croes, e sospechoso principal.
E investigadonan tambe a puntra e participantenan di e investigacion si nan mes a comete soborno. 3% so a bisa si. Pero ora di puntra nan si nan ta conoce un hende kende a comete soborno, casi 25% ta contesta positivo. Siguramente ora ta trata di obtene permisonan di estadia y trabou, di construccion, comercial of pa haya tereno di gobierno.
E investigacion complete ta riba e website di Banco Central di Aruba