DEN HAAG/ORANJESTAD – Gobierno di Aruba ta buscando un solucion pa e conflicto cu Hulanda riba e supervision financiero. Conseho di Minister di Reino ta duna e isla mas tempo, te 20 september,segun gobierno di prome minister Evelyn Wever-Croes.
Presidente di parlamento di Aruba Ady Thijsen tambe ta indica cu nan ta buscando un solucion. Pero cu ‘mester bin confiansa di tur dos banda’. “Pasobra ta netamente bou supervision di e Conseho di Minister di Reino y CAft cu Aruba su debe a subi durante e gabinete anterior di 70 pa 93% bnp.”
Ady Thijsen a traha un rapport hunto cu colega Rocco Tjon riba e ‘fayo’ di supervision ‘ilegal’ bou CAft y Conseho di Minister di Reino -potret Sharina Henriquez
Hulanda eora no mester bin cu palabranan so pero tambe accion, por ehempel duna Aruba un ‘fiansa suave’. “Asina nos por yega na un solucion pa tur”, segun Thijsen.
Pa hopi aña Aruba ta purba di convence Hulanda pa para garantia pa asina Aruba por fia placa riba e mercado internacional contra un interes mas abou (fiansa suave). Asina Auba por baha su debe como cu e gastonan di interes lo baha bastante.
Supervision financiero
Parlamento di Aruba a cambia e ley di supervision financiero (LAft) na juni pa asina e supervision ta bin bek na parlamento. Pero segun secretario di estado Raymond Knops, e cambio aki ta caba cu e supervision independiente di Conseho di Minister di Reino.
Desde e cambio tin un impasse entre tres partido: parlamento di Aruba cu ta warda riba nan propio gobierno pa afirma e cambio legislativo; gobierno di Aruba cu mester cumpli cu parlamento pero tambe cu e palabracionnan haci (den e protocol di 2018) cu gobierno di Hulanda riba supervision; y gobierno di Hulanda cu ta haya cu Aruba mester tene nan mes na e palabracionnan haci. Aworaki gobierno Arubano ta bisa cu nan ta traha riba un alternativa cual ta tene cuenta cu e precupacion di parlamento Arubano y di Conseho di Minister di Reino.
Presupuesto no ta na tempo
Tin basta preocupacion na Den Haag pasobra e debe nacional di Aruba a redobla bou e gabinete anterior di Eman di 2 pa 4 biyon florin. E gabinete actual di Wever-Croes ta purba di convence Den Haag cu nan si ta goberna responsabel. E deficit a baha di berdad, primordialmente pa motibo di hisa impuesto.
Pero corta gasto di personal no ta bay suficiente lihe, asina e organo di supervision financiero CAft tambe a expresa, y ya nan a adverti cu lo recomenda Conseho di Minister di Reino pa duna Aruba un instruccion.
Banda di esaki gobierno di Aruba no ta alcansa di entrega e presupuesto 2020 na tempo (esta 1 september) na parlamento. Asina gobierno ta violando e constitucion di Aruba.