ORANJESTAD – Aruba ta mantene e frontera cu Venezuela cera, te 10 december. Gobierno a extende e periodo pasobra e situacion na Venezuela segun nan no ta permiti cu nan por habri’e bek. “Nos tin 1000 peticion di asilo compara cu dos, tres un par di aña pasa”, segun e prome minister di Aruba.
Gobierno di Aruba ta purba di wanta e imigracion di Venezolanonan mas tanto posibel. Pasobra e placa – a calcula cu mester 30 miyon florin pa aña pa recepcion di 500 Venezolano maximo – e pais no tin. Tampoco pasobra e debe nacional ta hopi halto (93% bnp).
Ya tin 16 mil Venezolano riba e isla di casi 112 mil habitante. Mayoria di nan ta disparce den ilegalidad.
Ayudo Hulanda
Gobierno di Aruba y tambe parlamento a pidi Hulanda pa yuda cu e situacion pa basta tempo caba. Pero Hulanda no tabata dispuesto pa hopi tempo. Solamente nan a yuda cu experticio pa entre otro mehora e procedura di asilo.
Sinembargo diabierna pasa Hulanda finalmente a duna un suma di 10,9 miyon euro. Corsou tambe a haya casi mesun suma y e resto di e yudansa financiero aki (total 23,8 miyon euro) a bay pa maneha e crisis den e region.
Gobierno di Aruba a anuncia cu lo hinca mayoria di e placa aki den fortalesa di e frontera. Esaki lo nifica mas control riba lama en tera, pa combati contrabanda y traficacion di hende. Y tambe pa baha importacion di arma por ehempel.
Tambe nan lo inverti placa den ampliacion di detencion pa Venezolanonan ilegal gara kende mester warda den e celnan pa expulsion. No tin vuelonan directo pa Venezuela pero si por bula por medio di otro paisnan. Sinembargo e detencion por tuma tempo.
Desapunta
Organisacion di derechonan humano Human Rights Caribbean ta desapunta cu e yudansa di Hulanda como cu nan tabata spera cu placa tambe lo bay pa mehora e tratamento y recepcion di e refugiadonan Venezolano riba e islanan. Y no cu casi tur e placa ta bay pa detencion y mehoracion di e control riba e fronteranan.
Pero Aruba ta bisa cu un parti di e placa tambe ta bay pa educa muchanan Venezolano cu no ta permiti di bay scol. Tambe lo hinca placa den programanan di vacuna pa asina evita plamacion di malesanan contagioso na Aruba. Venezolanonan por trece e malesanan como cu na nan pais mayoria di e programanan di vacuna a para pa di falta di placa.
‘Nos ta gradici Hulanda pa e ayudo pero e ta hopi poco di locual nos mester’ -prome minister Evelyn Wever-Croes
Ainda cu e placa di Hulanda esaki lo no ta suficiente, prome minister di Aruba Evelyn Wever-Croes ta admiti. “Nos ta gradici Hulanda pa e ayudo aki. Pero e ta hopi poco pa locual nos mester contra e crisis aki.”
E no ta pensa cu Hulanda lo bin cu mas placa pronto. Aruba si ta buscando mas fondo na Union Europeo. “Pero esaki no ta bay lihe pa motibo di e burocracia grandi.”
Gobierno ta trahando ainda riba e implementacion di ESTA, un permiso electronico pa Venezolanonan por drenta Aruba. E speransa tabata pa implementa esaki prome di 10 september, e fecha final cu gobierno a pone pa e ceramento di e frontera. Sinembargo nan no a logra y pa motibo di esey nan tambe a extende e ceramento cu tres luna mas.