DEN HAAG – Atrobe Aruba ta haña tempu pa konvensé sekretario i estado Raymond Knops (Relashonnan den Reino) ku Konseho di Minister di Reino lo keda supervisá nan finansanan.
Tabata e ekspektativa ku Konseho di Minister lo a intervení, pa garantisá e supervishon di e finansanan arubano. Awor Hulanda ta bisa ku nan ke haña un trankilidat promé ku 18 di òktober.
Minister plenipotensiario Guillfred Besaril di Aruba visiblemente tabatin bon humor despues di e reunion ku Knops. “Oposishon (arubano) tabatin zjampaña kla pará. Awor nan por ward’é bèk.”
Awor Besaril ta ekspresá su speransa, ku tantu Aruba komo Hulanda e simannan binidero lo ‘basha awa den biña’ pa yega na un solushon entretantu.
Aruba ta kontentu pero Hulanda ainda nò
Sekretario di estado di Relashonnan den Reino – ku kende Aruba e simannan binidero lo keda kòmbersá – di tur manera no ta kontentu. Knops ta enfatisá ku e ta ’sumamente infelis’ i ‘masha disgustá’ ku parlamento ke kambia e lei ku ta regla e supervishon, di un manera ku Konseho di Minister di Reino no tin supervishon mas.
Segun gabinete Wever-Croes Aruba lo no laga gobernador firma e amienda ku a aseptá mas, pa asina e drenta na vigor. Knops ainda no ta trankil: “E ta riba nan lèsenar ainda, na moda di papia. Nan por mand’é ainda i mi ke pa e posibilidat ei kita for di mesa.”
‘Bon posishon pa negoshá’
Representante di gobièrnu Besaril ta keda ku bon speransa. E ta mustra riba e bon posishon di negoshashon ku su gabinete tin ku Hulanda, E gabinete aktual di promé minister Wever-Croes segun Besaril sí ta tene nan mes na palabrashon ku Hulanda, manera kuantu porshento e défisit di presupuesto arubano por ta.
Kámara di presupuesto
E representante di gobièrnu ta indiká tambe ku Aruba ta lantando un kámara di presupuesto, pa asina e isla mes por supervisá e finansanan. Si ta na gabinete Wever-Croes, ku esaki CAft – ku aktualmente ta supervisá i ta konsehá Konseho di Minister di Reino – den futuro lo bira supérfluo.