WILLEMSTAD – Un kolaboradó di e fundashon di mantenshon di naturalesa Stichting Uniek ta haña un aksidente durante di su trabou den su vehíkulo di trabou. Esun ku a kousa e aksidente ta resultá di no ta sigurá, e no tin reibeweis, i e no tin entrada. E outo tin hopi daño i e gastunan ta subi. Na Kòrsou esaki ke men ku bo mes mester paga mayoria di e gastunan di garashi.
“Pasobra”, Theo van der Giessen, direktor di e fundashon ta bisa: “bo no por ranka pluma for di morkoi”. E fundashon ta man na kabes. Riba Facebook nan ta hasi apelashon pa donashon pa por paga e gastunan. Theo i e kompania di seguro Ennia ta haña ku polis ta hasi muchu poko pa evitá stürmentu sin seguro.
Na Hulandes. Outor Kim Hendriksen
E relato di Stichting Uniek no ta pará riba su mes. “Awor ku hende tin ménos sèn di gasta pa motibu di krísis ekonómiko i desempleo haltu, por sosodé ku hende mester skohe entre un seguro òf nan pan di kada dia”, Faisel Brons, eksperto di daño di e kompania di seguro Ennia ta bisa. “No ta nada nobo pero e kantidat ta oumentá si.”
Segun Forensys tur dia tin un promedio di 36 aksidente di outo ta sosodé na Kòrsou. Anualmente esaki ta nifiká 1256 dalmentu di outo kaminda ta trata di un dalmentu ku un outomobilista sin seguro. Den e kaso ei e outomobilista ku sí tin seguro mes mester paga e gastunan di e dalmentu, si e no tin un seguro Casco plus òf All Risk.
Segun Van der Giessen e gastunan lo ta haltu: “E daño, na e outo so, ta bai kosta nos 15 mil florin. Gastu haltu asina por kaba ku e fundashon.” E ta kunsumí ku e hóben a haña solamente un but. “Mayan kasi sigur e ta drenta un otro outo trankil di dje.”
E Lei Di Seguro di Responsabilidat Sivil di Vehíkulo Motorisá ta preskribí ku tur hende ku subi kaya ku un vehíkulo motorisá mester tin un seguro. E kastigu ta un but ku ta paga na OM. E suma aki no ta yega serka e otro partido si ta trata di un aksidente.
But i detenshon
Segun Ivo Out, fiskal enkargá ku e kartera di tráfiko, e maneho den e tipo di kasonan aki ta duna but i maneho di residivismo. Out: “Si un persona asina kousa un dalmentu di outo mas ku un bia, miéntras ku e no ta sigurá, e ora ei e eksigensia penal ta detenshon.”