WILLEMSTAD/ORANJESTAD – Kòrsou segun e ehèmpel di Aruba tambe ke baha e interes di e fiansa di estudio pa sero porshento. Siman pasá e minister arubano a anunsiá ku e konseho di minister ta di akuerdo kaba ku e introdukshon entrante 1 di yanüari 2020.
Un motibu importante pa hasi e fiansa di estudio mas barata, ta pasobra e islanan ta mira ku esnan ku a kaba di studia ta keda Hulanda. Pasobra ei nan ta gana mas sèn pa por paga nan fiansa mas fásil i mas lihé. Pero e islanan ta preferá pa esnan ku edukashon haltu bolbe bèk mas lihé posibel despues ku nan haña nan diploma. Pasobra tin hopi falta di hende ku edukashon haltu na Aruba i Kòrsou.
E asina yamá fiansa di Aruba te 2015 tabata un fiansa di estudio karu ku un interes di amortisashon di 6 porshento. For di 2015 e interes a baha pa 3 te 2 porshento i awor entrante otro aña te sero. Minister di Enseñansa arubano Rudy Lampe ademas ta bisa ku studiante ku tin un fiansa ta kore kaba tambe ta probechá di esaki.
Bahamentu na Kòrsou
Minister di Enseñansa na Kòrsou, Marilyn Alcalá Wallé, awor tambe ke baha e interes di e fiansa lokal serka Finansiamentu di Estudio Kòrsou (SSC, Studie Financiering Curaçao). Tabata e intenshon ku e interes di e fiansanan di estudio entrante yanüari di e aña aki lo a baha di 4 pa 2 porshento. “E tempu ei e proposishon ei no a haña aprobashon den Konseho di Minister pasobra e tabata falta argumentashon. Awor mi ta warda konseho pero mi tin konfiansa ku nos na Kòrsou, meskos ku na Aruba, por yega na un fiansa ku sero porshento interes.”
Alcalá Wallé aktualmente ta na Hulanda pa e Deliberashon di Enseñansa di Kuater Pais entre Kòrsou, Aruba, Sint Maarten i Hulanda. Tambe a trata e problemanan di paga debe di e fiansanan di estudio di DUO. Segun e minister un areglo di kapasidat finansiero adaptá no ta nesesario pa e islanan.
Lat na DUO
E problema ta ku DUO ta liá na servisio di impuesto hulandes i no na servisio di impuesto di Kòrsou, Aruba òf Sint Maarten. Dato di èks studiante hopi bia ta yega DUO lat i e ora ei a hasi un kalkulashon kaba. Mester bini informashon mas rápido i mas kla p’esaki.” Riba e pregunta si mester konektá servisio di impuesto lokal na DUO, Alcalá Wallé ta kontestá ku e so no por disidí esaki. “Ta un idea si.”
DUO ta bai Islariba tambe
DUO ta tene muchu poko kuenta ku e situashon lokal, èks studiante ta haña tambe despues di e enkuentronan di informashon di e instansha na Kòrsou. E siman aki e kolaboradónan di DUO ta na Aruba.
