SCHIEDAM – “Mi a traha asina duru i mi a logra”, Sharelly Emanuelson (33) ta hari miéntras ku den e hal di Stedelijk Museum Schiedam e ta seka e lágrimanan na su kara. Emanuelson ta un di e sinku nominadonan pa e Volkskrant Beeldende Kunst Prijs (Premio Volkskrant Arte Plástiko). P’esei su obra ta den un museo.
Ku un tas yen di pida tela Emanuelson ta kana tembla di friu den Stedelijk Museum di Schiedam. “Nunka mi no lo kustumá ku e friu ei”, e artista ku gusta hari ta konta. Pa konstruí e eksposishon el a bini te Schiedam for di Kòrsou. Na Kòrsou el a lanta e fundashon Uniarte, ku kua e ta sostené artista di área karibense.
Video na Hulandes
Video: Rinkie Bartels
Hulanda no ta un tereno deskonosí pa Emanuelson. El a studia nan akademia di arte na Den Haag i aña pasa ku invitashon di Thami Mnyele Foundation el a partisipá na un programa ‘artists in residence’ na Amsterdam. “Mi tabat’éi ora ma tende ku a nominá mi pa e premio aki.”
Bista kolonial riba e islanan
Ku su eksperensia i e bida den tur dos parti di reino Hulandes Emanuelson ta ripará ku ta eksistí falta di konosementu tokante di e islanan na tur dos banda di oséano. “Durante mi investigashon mi a mira ku e relatonan ku un tempu media a konta tokante Antia, a konta nan espesialmente for di un perspektiva hulandes.”
Si bo bai Nederlands Instituut voor Beeld en Geluid (Instituto Hulandes pa Imágen i Zonidu) den e notisianan bieu di Polygoon bo ta mira e bista kolonial riba e islanan. Entretantu nos sa ku e perspektiva ei no ta korekto, pero e relatonan ei ta forma e base si i ainda ta determiná e bista hulandes riba e islanan.’
‘Nos tambe tin un relato’
E título di su eksposishon ‘En Mi Pais’ ta referí na e imigrantenan di abla spañó na e islanan. Hopi bia nan ta kuminsá relato tokante di nan pais di orígen ku e frase ‘en mi pais’. “Den sierto sentido na Hulanda nos tambe ta migrante i nos tambe tin un relato tokante nos islanan.”
Pa e motibu ei den su eksposishon Emanuelson ta usa relato di guia di biahe. “Nan ta un konsepto na nos islanan i ta forma un bon medio pa den un tempu rápido siña algu mas tokante e islanan. Pero asina mes ainda bo ta ripará ku tur hende tin nan mes relato i un propio realidat. P’esei ta ‘en mi pais’.
Anunsio di e ganadó
Na mart lo anunsiá e ganadó di e Premio Volkskrant Arte Plástiko, ku ta konsistí di un suma di 10 mil euro i un publikashon di buki tambe na balor di 10 mil euro. Pero si ta na Emanuelson a logra e meta pa un gran parti kaba: ‘kompartí su relato tokante di e islanan ku un públiko mas amplio’.