PHILIPSBURG – A pone e promé persona na Sint Maarten den karentena pa sospecho di kontaminashon ku COVID-19. Esaki ta nifiká ku lo hasi e medidanan na e isla mas skèrpi. Mésora lo para tur buelo i skolnan i ‘kompanianan no esensial’ lo sera.
Na e banda franses (Saint Martin) habitantenan por sali solamente den kasonan eksepshonal. Ei tambe a kanselá tur buelo i a sera skolnan i kompanianan no esensial (ta konsiderá botika i supermerkado komo esensial i nan si ta habri).
Habitante so por drenta e isla
Den un rueda di prensa adishonal promé minister Silveria Jacobs a kaba di bisa ku ta persona ku un sedula bálido di Sint Maarten òf prueba di registrashon so por regresá na e isla.
Buelo pa hiba turista bèk
Bishitante di Sint Maarten si por sali for di e pais ainda. Asina Air France KLM tabata na aeropuerto pa buska pasahero. Tambe spesialista médiko òf tékniko solamente riba invitashon di gobièrnu por bini Sint Maarten.
Outo-karentena obligatorio
Pa tur habitante ku bini bèk ta konta ku nan mester bai den outo-karentena. Hende ku ta sufri di síntoma – tambe si nan no a biaha último simannan – por yama 914 òf nan dòkter.
E laboratorio di Sint Maarten (Sint Maarten Laboratory Services) por hasi tèst pa 19 tipo di grip e despues mand’e via Guadeloupe pa tèst pa COVID-19
Hóreka a sera for di djárason
Na e banda franses di e isla hóreka a sera obligatoriamente for di djamars 17 di mart. Pero na e banda hulandes tur kaminda ta habrí ainda. Djárason tur kompania mester a sera, ku eksepshon di kompania esensial manera botika i supermerkado.
Anteriormente diferente negoshi i por ehèmpel e skol di deporte Bel Air Fitness Centre a disidí kaba pa sera. McDonalds su drive through so ta habrí.
No ta para tráfiko di karga. “No ta un orkan, tin awa, koriente i internet. No kumpra montoná warda”, e promé minister a enfatisá den e konferensha di prensa. Tambe e ta apelá pa mantené distansha físiko di otro.
‘No tin kontaminashon ofishal di corona ainda’
E hòmber ku tabata sospechoso di ta kontaminá ku e viro corona a biaha bai Inglatera via Miami.
E promé tèst na Guadeloupe tabata positivo, awor RIVM na Hulanda mester konfirmá esaki.