Portrèt: KPA

24 March 2020 | John Samson

DEN HAAG – SP i GroenLinks ta ‘konsterná’ ku gobièrnu arubano a laga arestá un periodista tambe durante e toke de keda. E partidonan a hasi pregunta den Tweede Kamer.

Den e lucha kontra e viro corona, gobièrnu di Aruba ta taha habitante pa sali for di kas den oranan di anochi. Solamente hende ku un trabou krusial por subi kaya. Pa konsternashon di Tweede Kamer no ta konsiderá prensa bou di e hendenan aki.

Komo konsekuensha a arestá Sharina Henriquez di Ret Karibense djadumingu anochi durante di su trabou. Tambe el a haña un but di 1000 florin.

‘No tin ayudo pa Aruba sin prensa liber’
SP i GroenLinks ta ‘konsterná’ ku a arestá e periodista durante di su trabou. “No por malusá e krísis aki pa sera boka di periodista”, e parlamentario di SP Ronald van Raak ta haña.

“Un kos teribel”, e parlamentario Nevin Özütok di GroenLinks ta bisa. “Komo parlamentario nos t’ei pa kontrolá gobièrnu tambe. Hopi informashon ku nos ta haña ta danki na prensa. Kisas tin kos robes ta sosodé, nèt pasobra tin toke de keda.”

Si ta na SP no ta bini ayudo di Hulanda miéntras tantu ku periodista no por traha den libertat. “Nos mester yuda Aruba. Pero si nos yuda Aruba nos por pone kondishon tambe.”

Promé minister Wever-Croes: ‘Mi ta konta ku boso sosten’
Djabièrnè promé minister Wever-Croes a enfatisá seka Ret Karibense ku e toke de keda ta ‘nesesario durante un krísis masha serio’ i e ta keda seka su desishon pa tene periodista tambe afó. “No tin kuenta di limitashon di libertat di prensa.”

“Por fabor komprondé, pasobra nos ta den un krísis ku no a premirá ku ta kòrta e ader di nos ekonomia”, segun e promé minister. “Nos ta pidi prensa pa koperá ku nos algun ora. Mi ta konta ku boso sosten.”

Polis mes ta reportá tokante toke de keda

Segun gabinete arubano periodista no tin nodi di prekupá: polis lo reportá na lugá di prensa. “Kuerpo polisial di Aruba lo reportá tur kos ku tuma lugá anochi entre 20.00 i 03.00 or. I ami lo duna prensa informashon”, segun promé minister Wever-Croes.

Parlamentarionan: ‘Nèt awor durante un krísis prensa ta krusial’
Van Raak (SP) ta haña ku ta mal kos ku poder polítiko a bai sinta riba stul di e periodista. “No ta na polítikonan pa disidí kiko ta notisia. Si un periodista ke reportá tokante mantenshon di toke de keda, esaki ta e eskoho di e periodista.”

“Esakinan ta momentonan krusial pa prensa”, Özütuk (Groen Links) ta haña.”Si prensa – komo testigu independiente – no skibi i reportá tokante toke de keda, e ora ei nos nos sa eksaktamente ta kiko ta sosodé.”

Inofishalmente kaba diferente parlamentario último wikènt a ekspresá nan prekupashon na polítikonan arubano. Prensa arubano ker a sinta na mesa ku e promé minister i e Asosiashon di Periodista a manda un karta di urgensia pa Wever-Croes.

Gabinete di Aruba no ke reakshoná awe riba e aresto


A pidi gabinete arubano pa un reakshon riba e aresto di e periodista, pasobra ta un konsekuensha direkto di e medida di emergensia. Promé minister Wever-Croes via su bosero a laga sa djaluna ku ‘e ta muchu okupá pa por reakshoná ku kontenido’ i ta referí na Ministerio Públiko.

Periodismo ta un ‘profeshon krusial’
Meskos ku DP GroenLinks tambe ta spera ku gobièrnu arubano lo mira ‘ku e medida aki pa periodista no ta proporshonal’. “Mi ta spera en todo kaso ku e promé minister lo wak e asuntu aki bon i ku lo drech’é, segun Nevin Özütok.

“Den un tempu di krísis mester tuma medida masha drástiko i mester pèrkurá tambe pa tin hopi sosten p’esaki”, Ronald van Raak (SP) ta bisa. “Esaki por solamente si tin masha hopi kòntròl riba tur e medidanan aki. Periodismo ta un profeshon krusial.”