HILVERSUM – Aktor i komediante Jandino Asporaat, ta yama tur hende pa durante su show benéfiko, riba 9 di mei, tuma akshon kontra di e pobresa ku ta kresiendo na Kòrsou, Aruba i Sint maarten.

E lockdown na e islanan a para turismo, e fuente di entrada di mas grandi, kompletamente. Ku konsekuensha di pobresa i hamber.

“Den e parti karibense di nos reino tin un desaster silensioso ta tuma lugá. Kuminda riba mesa aktualmente no ta klaro mas pa hopi famia”, Asporaat ta konta. “Mi mes ta bini di pobresa, mi sa kon ta pa bai drumi sin kome. Bo no ke esaki pa niun hende. P’esei nos tin hopi mester di boso ayudo.”

Pakete di kuminda
Asporaat a nase na Kòrsou i a biba ei te su di diesun aña. For di su embolbimentu ku e habitantenan el a lanta e akshon #sameneenkoninkrijk (un reino huntu trad.) pa rekoudá sèn pa Kòrsou, Aruba i Sint Maarten. Ku e donashonnan rekoudá lo traha pakete di kuminda i partinan bou di pueblo.

Show kaluroso
E show Un Reino Huntu ta bira un show kaluroso ku hopi aktuashon espesial, relato emoshonante i inisiativa atraktivo di e pais. Naturalmente por hari tambe i un wéspet espesial lo divulgá e suma final di e rekoudashon.

Ret Karibense a kontribuí na e realisashon di e show di televishon. Bo tambe ke kontribuí? Bai sameneenkoninkrijk.nl.

Ta transmití e show benéfiko Samen een Koninkrijk live riba djasabra 9 di mei 20.35 or, ora di Hulanda, na NTR riba NPO1. Na e islanan live via BVN via kabel, satélite i online, ora lokal 14.35 or.

Bo tambe ke partisipá?
E show benéfiko live riba 9 di mei na NPO 1 ta un kontinuashon di e benéfiko ku Jandino a transmití riba 25 di aprel via Instagram. Tur dos evento ta parti di Jandino su inisiativa #sameneenkoninkrijk, ku a establesé ku ayudo di Cordaid i SHC (Samenwerkende Hulporganisatie Curacao, Koperashon di Organisashonnan di Ayudo Kòrsou).