ORANJESTAD – Djaluna skolnan na Aruba por a habri atrobe despues di dos luna. Pero hopi di nan a tene porta será pasobra no tabatin basta tempu pa introdusí tur e medidanan di seguridat. Ademas un grupo grandi di dosente ta rabiá ku gobièrnu arubano.
Mas o ménos 200 dosente a duna oido na un yamada pa un reunion di urgensia di e sindikato arubano di enseñansa Simar, tokante e problemanan.
“Nos a tende ku na algun skol e dosentenan mes mester a bini ku nan hand sanitizer. Wel, si dosentenan mester bini ku nan propio materialnan, e skol nan no ta kla ainda, e lider di e sindikato Josephine Albertus ta bisa.
Albertus ta splika ku gobièrnu arubano promé ku e krísis di corona kaba no tabata invertí sufisiente den mantenshon di skolnan. Banda di esaki awor mester di sèn èkstra pa adaptá e klasnan i pa kumpli ku otro medida di seguridat.
Pero espesialmente tin un falta di komunikashon kaminda gobièrnu sin deliberashon i ad hoc ta tuma tur sorto di desishon, e bònt i dosente presente na e reunion di emergensia ta bisa.
“Hopi bia nos ta tende di kambio via media òf riba social media”, Albertus ta bisa.
Protesta
Dosentenan na e reunion di emergensia tin miedu di papia libramente ku media. Un dosente ku ke keda anónimo tin ‘pregunta grandi’ si ta seif kaba pa e muchanan bai skol atrobe.
Un kleuterleider ta konta ku su mayornan a bis’é ku nan no ke manda nan yunan skol pasobra ‘nan tin miedu di infekshon ainda’.
Awor e plan ta pa tene un marcha di protesta djárason. Mayornan i alumnonan tambe por djòin, e bònt di dosente ta bisa. Ademas e ekspektativa ta ku mas sindikato lo partisipá pa motibu di malkontentu tokante e maneho di gabinete di Aruba.
‘Riesgo masha abou’
Gabinete arubano for di 18 di mei a suavisá un kantidat grandi di medida di corona. Ke men awor skolnan na e isla por habri. Pa mas tardá otro siman djaluna gabinete ta spera ku nan tur lo ta habrí. Den e konferensha di prensa di gabinete djaluna médiko di mucha Wicha Ponson-Wever a deklará ku ta seif pa mucha i dosente bai skol atrobe.
“E riesgo di komplikashon di e vírùs tambe pa mucha ku enfermedat króniko manera diabétis i asma, ta masha abou. Ta importante tambe pa realisá ku falta di enseñansa por perhudiká nos muchanan.”