WILLEMSTAD – E Asosiashon di Músiko Kurasoleño (AMAK) ta ferwagt ku hopi músiko na e isla lo mester laga nan trabou komo músiko bai pa motibu di e krísis di corona. Segun hopi músiko e situashon promé ku e krísis ya no tabata bon i nan mester a haña yudansa i rekonosementu hopi mas promé di gobièrnu i organisashonnan di interes.
Tin mas o ménos 2.000 músiko ta biba na Kòrsou di kua 300 ta miembro di AMAK ku ta paga. E músikonan ta sufri un pèrdida pa luna di 50 mil florin. (25.029 euro) miéntras ku e perspektivanan ta masha malu. E organisashon di interes AMAK ta bisa ku nan mes no tin fondo pa yuda e miembronan.
No tin yudansa
“AMAK apénas tin entrada”, su presidente Feco Gomez ta bisa. “95 porshento di e entradanan di e Festival di Tumba tur aña ta bai pa e artistanan ku ta presentá. E gastunan ta haltu i loke ta sobra pa Amak apénas ta sufisiente pa laga e ofisina funshoná i paga e kuentanan di awa i elektrisidat.”
E organisashon ta lucha tambe ku un debe di belásten i aña pasá tabatin un pèrdida di 160.000 florin (80.000 euro), motibu pa e tuma un fiansa. E organisashon di interes ta bisa ku promé ku e pandemia a plama nan a pidi gobièrnu pa yudansa kaba diferente bia.
Segun AMAK tabatin kombersashon ku gobièrnu tokante sosten pa e kompleho di Curaçao Festival Center, e formashon musikal ku ta pega pa falta di sèn i supsidio. Pero tur esaki sin resultado konkreto.
No tin rekonosementu
Segun kantante i músiko Reinier Lijfrock músiko i artista na Kòrsou ‘no ta haña e rekonosementu ku nan meresé’. P’esei e krísis ta kai èkstra pisá pa nan. Ademas segun Lijfrock ‘Amak no ta hasi sufisiente pa su miembronan’.
Reinier Lijfrock durante Tumba 2018 – Fuente: Telecuraçao
Lijfrock mes tin diferente presentashon ku a kanselá. E ta aktua entre otro na hasimentu di aña , entiero i hotèl. Ku e medidanan tin ménos aktuashon i ménos entrada. Awor e mester usa su sèn di spar pa mantené su famia. “Esaki ta un sla duru”, Lijfrock ta bisa.
Dulce Koopman ta papia ku e kantante Reinier Lijfrock (na papiamentu)
Segun Lijfrock ta masha insigur kiko ta bai sosodé. Suavisashon di e medidanan ainda no ta sufisiente pa e músikonan por traha normal atrobe. P’esei Lijfrock ta usa e tempu liber obligatorio pa reorganisá su repertorio i su proyektonan.
Kultura na peliger
Pianista i kompositor Randal Corsen a mira kanselashon di diferente di su aktuashonnan, entre nan dos aktuashon grandi na Hulanda i un na Aruba i tambe un dokumental di muzik di Kòrsou.
Segun Corsen aktualmente ta difísil pa sobreviví komo músiko. Tòg e ta den un posishon mas favorabel ku su koleganan pasobra e por rekurí na dunamentu di lès i pasobra e por konta ku entrada di su kasá ku sí tin trabou ainda. Corsen ta prekupá si pa futuro: kultura di Kòrsou por sobreviví e krísis? I kon ta sigui despues?
No opstante e situashon desapuntante Corsen no ke pèrdè kurashi. Asina e mes durante di e lockdown a pasa hopi ora na su piano studiando. Su konseho na su kolega músikonan i artistanan ta antó pa sigui traha na nan propio formashon i produkshonnan pa esakinan ta kla ora e situashon bira normal atrobe. “Prepará bo mes pa bo t’ei atrobe ora e sirkunstanshanan drecha.”