KRALENDIJK- E ola mundial di demonstrashon kontra rasismo i inhustisia tambe a yega na Boneiru. Djárason mas ku setenta persona a bini huntu na Parke Wilhelmina den e lucha kontra rasismo.
Guerlian Gougon, representante di e movishon ‘Black Lives Matter’ a organisá e demonstrashon aki. “Nos tin e pensamentu ku nada no ta kambia p’esei nos no ta protesta. Nos tin ku kambia e mentalidat aki.”
Reportage pa Marit Severijnse i Nathaly Evertsz-Ipcedencia
Segun Gougon su lucha no ta solamente pa kambio di mentalidat pero tambe pa eliminá e miedu ku diariamente e Boneriano ta konfrontá. Miedu pa outoridat, doñonan di trabou i institutonan ta algun ehèmpel ku el a menshoná.
“Nos tin di aber ku inhustisia tur dia. Miedu ta pone ku hende no ta habri boka. I nada no ta kambia”. Gougon ta enfatisá ku e movementu ta pa yuda tur ku ta wòrdu oprimí. “Ami ta kontra di e establesimentu di opreshon Hulandes riba ami, hòmber di kolo”, e ta bisa.
Kasonan di diskriminashon na Boneiru a oumentá
Remarkabel ta e echo ku diferente hende ta menshoná ku e último añanan kasonan di diskriminashon na Boneiru a oumentá. “Aki na Boneiru nunka nos a sinti esaki. E último añanan lamentablemente por ripara ku tin basta kaso di diskriminashon.
Kisas ta e preis ku mester paga pa desaroyo òf kisas pa motibu ku nos a surpasá e kantidat di binti mil abitante”, demonstrante Robbie Beukenboom ta bisa. “Mi ta kere ku algu hopi bon lo ta si Hulanda realisá i un dia pidi despensa pa e página hopi skur den historia kolonial. Esaki ta sklabitut”, Beukenboom ta amplia.
‘Boneriano ta sintié menasái i den minoria’
Riet Sealy, un Hulandes ku tin mas ku 30 aña bibá na Boneiru tambe ta sostené e kousa. “E forsa di Boneiru tabata ku tur rasa por a biba i kompartí ku otro. Awendia e Boneriano ta sintié menasái i den minoria. Esaki no tin mester. Si e Boneriano ta orguyoso di su kultura i su idioma nunka el o por sintié menasá”, Sealy ta bisa.
Durante e demonstrashon tabatin diferente personanan ku a bisa spich. Nina Den Heyer, diputado di Asuntunan Sosial i Labor, a pone enfasis ku e lucha kontra rasismo i diskriminashon ta tur hende su responsabilidat. “Un mucha no ta nase rasista. Kada un di nos mester para ketu ta kon nos ta eduká nos yunan. Nos ta e ehèmpel di nos yunan”, Nina den Heyer a klousura su spich.
Petishon pa eliminá plakat di Van Walbeeck
E siguiente stap di e movementu ‘Black Lives Matter’ ta pa organisá nan mes ofisialmente. Despues nan lo entrega un petishon na Gobièrnu pa eliminá e plakat di Johan Van Walbeeck riba Parke Wilhelmina.