ORANJESTAD – Dialuna 15 juni proximo Aruba lo cuminsa habri su frontera cu Corsou y Boneiro y 1 di juli cu Europa, Canada y e resto di Caribe (cu excepcion di Santo Domingo y Haiti). For di 10 di juli lo habri e frontera cu Merca for di unda mayoria di turista ta bini.
E ultimo decision di gobierno ta controversial como cu otro islanan den Reino manera BES y Corsou lo no habri por lo pronto e frontera cu Merca pa motibo di e riesgo di corona. Hulanda ta avisa pa biaha pa Merca solamente si ta necesario. Y autoridadnan di salud Mericano mes ta avisando habitantenan pa no biaha pa exterior.
Test na yegada
Sinembargo minister di salud publico Dangui Oduber ta bisa cu Aruba ta sigui ‘tur conseho di RIVM’. E instituto di salud Hulandes aki tambe a avisa pa tur hende test obligatoriamente prome di subi vuelo pa Aruba. “Pero aeroliñanan nan a bisa nos cu eora lo cancela tur vuelo pa Aruba y lo bula pa otro destinacionnan den Caribe.”
Seguro di Covid obligatorio
Pa motibo di esey a dicidi pa haci e test obligatorio na yegada, e minister ta bisa. Turistanan por haci e test adelanta tambe na nan pais mes y manda e resultato negativo pa Aruba. Tambe nan mester yena e ED-card (immigracion) y un aclaracion di salud por ultimo 72 ora prome di sali. Un otro rekisito ta e seguro di Covid. “Esaki ta costa 15 dollar pa persona pa dia y lo cubri tur gasto di cuarentena y cuido medico na Aruba. Tambe e cuido di intensive care”, segun Oduber.
Normalmente turista no por sigura nan mes contra un pandemia. Sinembargo gobierno a regla conhuntamente cu e companianan di seguro local cu tin e pakete di seguro special aki. Pa evita tambe cu e isla mester cubri gastonan medico di turistanan cu a bira malo di corona.
Esunnan cu lo haci e test na Aruba mes, mester paga 75 dollar y keda 24 ora den cuarentena den e acomodacion cu nan a boek. Turistanan cu ta sali positivo, mester bay den isolacion den un otro acomodacion reserva pa casonan asina.
Menos cu mita di e cantidad di turista
Aruba lo spera na juli mas o menos 2000 turista pa siman. Esaki ta 20 porciento di e cantidad den e mesun luna aña pasa. Oficina di turismo ATA ta premira cu lo cera e aña aki cu 50 pa 70 porciento menos di turista compara cu 2019.
Finalmente, e frontera cu Central en Sur America lo keda cera por lo pronto.