KRALENDIJK- Personal di BOPEC, miembronan di gerensia, eks-trahadónan i penshonado di e kompania aki, ta protesta kontra seramentu di e kompania.
E situashon aktual ta mustra ku BOPEC lo sera porta i trahadónan lo pèrdè nan trabou. Ta opvio ku esaki ta un sla duru pa e ekonomia di Boneiru. Ademas por nota ku e situashon aki a trese inkietut sosial. P’esei diferente hende a uni den e marcha di protesta.
Por Marit Severijnse i Nathaly Evertsz-Ipcedencia
“Ta kibra mi kurason ku Boneiru ta pèrdè un kompania ku pa mas di 40 aña a forma parti di nos”, Mitchel Coffie a bisa. “Mi ta un eks-trahadó di BOPEC i mi no por komprondé kon e situashon a yega asina leu”.
Bankarota
Komo un último opshon sindikatonan a hasi un apelashon riba gobièrnu hulandes pa tuma e responsabilidat i deklará BOPEC bankarota. Asina por reinisiá e kompania i salbaguardiá kuponan di trabou. Tambe nan a pidi gobièrnu lokal i sektor priva pa uni na e apelashon aki.
Pa Nochi Willem di sindikato USIBO a yega ora pa tur hende uni i bai pa un solushon.“Mentalmente a kastigá trahadónan i ekonomia di Boneiru ta na luto. Nos ke un solushon, nos no ta drumi”, el a bisa.
