WILLEMSTAD – “E situashon aki ta krítiko, hopi pió ku na kas. Aki tur kaminda mester bisti tapaboka i tene kuenta ku distansha sosial. Ta un kambio grandi, pero mi no ta haña ku ta un problema asina grandi. Mi no ta bai bèk.”
Studiante di promé aña Jade Bernadina ta studia pedagogia na Haagse Hogeschool i ta pertenesé na e grupo di bùrsal ku kada aña ta sali for di Kòrsou bai Hulanda pa studia. E di dos ola di corona ta toka e hóbennan aki tambe. Pero segun Bernadina mayoria di nan ta keda tòg, ounke nan mester sigui lès na kas via computer.
studiante Jade Bernadina – propio potrèt
‘Mi konosé un mucha muhé ku no gusta e skol i e ta bai bèk. E ke bini Hulanda bèk otro aña sí. Pero e otronan ku kua mi a bini for di Kòrsou, tur ta keda. Ami tambe, pasobra mi a bini ku un meta i mi ke logra esaki promé.
Bernadina a haña un tiki lástima sí ku komo studiante di promé aña e no por bai skol pa sera konosí i sigui e lèsnan. “Na Kòrsou ainda mi tabata haña lès físikamente ainda ke men awor si mi mester kustumá ku tur kos ta bai online. Ta mas difísil tambe pa paga atenshon na kas. Pero mi a kustumá kaba i dje grandi e problema no ta tampoko.
‘Ta lástima ku bo no por bai skol ma dje grandi e problema no ta tampoko’- studiante Jade Bernadina
studiante na Universidat di Kòrsou – propio archivo
Universidat di Kòrsou a ferwagt ku pa motibu di e pandemia mas hóben lo a skohe pa keda na e isla pa sigui un estudio. Pero e kantidat di inskripshon ta komparabel ku aña pasá, rèktòr Francis Delanoy ta bisa. Loke sí nan ta haña regularmente, ta petishon di studiante pa por kontinuá nan estudio na e universidat kurasoleño.
Esaki por, tin un areglo kaba den Reino. Studiante por troka pero e ora ei nan mester sigui un estudio na un instansha akreditá pa NVO. Mi ta konsehá nan si pa kaba nan semèster i alkansá nan materia.”
Sidney Justiana di SSC – potrèt: Dulce Koopman
‘Nos ta tene un enkuesta kon nan ta eksperensi’é’- Sidney Justiana di SSC
Stichting Studiefianciering Curaçao (SSC) ta informá ku e aña aki 10 studiante ménos so a biaha pa Hulanda kompará ku aña pasá. Direktor interino Sidney Justiana ta bisa ku e no tin e impreshon ku studiante tin tantu difikultat na Hulanda ku nan ke bini bèk masalmente.
“Semper tin di nan ku tin falta di kas pero no mas ku e añanan anterior. Nos ta tene un enkuesta si bou di e studiantenan kon nan ta eksperensiá e kos, kiko nan ta haña di e guia, ets. Pronto e resultadonan lo drenta.”
‘Na e islanan nan tabatin mas libertat, awor sí ta di keda paden’ -Miraila Bernadina-Theodora, Virtual Youth Support
Miraila Bernadina-Theodora di Virtual Youth Support – potrèt: Dulce Koopman
Miraila Bernadina Theodora, direktor di Virtual Youth Support ku ta guia hóben di e islanan karibense-hulandes ta bisa ku e studiantenan ta mas frustrá si na Hulanda. “Na e islanan tòg nan tabatin mas tantu libertat i awor nan mester tene kuidou i keda paden. Awor ta birando mas friu tambe ke men nan ta mas sera paden atrobe.”
Pa sigui lès online segun e tambe ta pidi un disiplina mas grandi. “Mi mes tambe ta duna lès i niun hende no sa kiko ta sosodé tras di e kámara. No tin e kòntròl mas i esaki mester bini sí. Espesialmente pa hóbennan di e islanan. Mi ta konsehá nan ademas: hasi manera bo ta bai trabou tur dia di 9 pa 5. Maske e lès online ta kuminsá te atardi.”