WILLEMSTAD – Mas ku 125 mion euro (kasi 260 mion florin antiano) awor Hulanda ta dispuesto di hinka den Kòrsou, despues ku tur dos gobièrnu a firma un akuerdo polítiko. Ademas e gobièrnunan ta bisa ku e kondishonnan pa e pakete di sosten no ta afektá outononomia di e pais mas.
Pero no tur hende na e isla ta di akuerdo ku esaki. Sekretario di Estado Raymond Knops tambe na ora di firma ta pone e remarke aki: “Niun ora esaki lo no ta un trayekto fásil. Pasobra firma ta masha simpel i hasi palabrashon tambe. Pero e ehekushon di tur dos banda sigur lo pidi hopi esfuerso ainda di nos tur.”
Raymond Knops, oudio di Kim Hendriksen (na Hulandes)
E promé minister kurasoleño Eugene Rhuggenaath (PAR) ta haña ku ‘di ámbos banda ta trata di commitment’. “Huntu nos a logra pa yega na bon palabrashon i bon koperashon.”
Eugene Rhuggenaath, oudio di Kim Hendriksen (na Hulandes)
Minister di Desaroyo Ekonómiko, Steven Martina di partido di koalishon MAN ta satisfecho ku e resultado final. E ta enfatisá ku su partido awor sí por biba ku e proposishon bou di kua el a pone su firma.
Steven Martina, oudio di Kim Hendriksen (na Hulandes)
Kiko Kòrsou ta haña?
Ta despues di e firmamentu numa ta bira kla kiko e pakete di sosten ta kontené, ora e karta di Knops bai Tweede Kamer. En todo kaso Kòrsou porfin ta haña e 105 mion florin di sosten di likididat, e di tres tranche di fiansa ku Hulanda a ofresé na yüli bou di kondishonnan èkstra. I esei por bira mas si Cft konsehá ku e isla den krísis mester di mas sèn.
Pero Hulanda tambe a primintí di invertí hopi mas:
- 30 mion euro den edifisio di enseñansa (manera dak ku ta lèk i pa seguridat)
- 20 mion maksimalmente pa entre otro kompania ku a sufri di corona (donashon òf fiansa)
- 18,5 mion euro pa KMar, duana i wardakosta pa mihó vigilansia na frontera
- 5,2 mion euro pa enfoke di debilitashon (na man di kriminal)
- 1,2 mion euro pa resosialisashon di hóben (Trayekto di Formashon Sosial)
- 0,4 mion euro pa protekshon di dato
E sèn ta bini bou di maneho di e entidat nobo ku awor definitivamente lo yama COHO (Órgano Karibense pa Reformashon i Desaroyo). E ta bira un órgano di gobièrnu independiente i den forma di un persona hurídiko hulandes. Manera ta konosí tur esaki ta reglá den un asina yamá lei di konsenso di Reino. Aruba i Sint Maarten ainda por partisipá na esaki, Knops ta skibi den e karta na Tweede Kamer.
“Asina e paisnan aki a kumpli ku e kondishonnan di e di dos tranche i bai di akuerdo ku e di tres tranche.”
Aruba ta seka kla
Gobièrnu arubano durante e trato di e presupuesto supletorio djaluna, a pidi parlamento pa bai d akuerdo ku e kondishonnan hulandes pa e pakete di sosten. Nos a bini kla ku Hulanda i ku e kuater kambionan krusial ku a salba nos outonomia”, segun promé minister Evelyn Wever-Croes. Si parlamento arubano duna lus bèrdè, gobièrnu arubano mes ora lo firma un akuerdo polítiko ku Hulanda.
