DEN HAAG – Es ku den e munisipionan karibense Boneiru, Saba i Sint Eustatius ta traha den kuido, no ta haña 1.000 euro di bónùs pa e lucha kontra e vírùs di corona. GroenLinks i VVD ta eksihí pa gobièrnu bòltu e desishon aki rápidamente.
Personal di kuido ku pa motibu di corona mester a traha ofertaim òf a kore riesgo èkstra, e aña aki ta haña un bónus di 1.000 euro nèto. No pa esnan ku ta traha den e munisipionan karibense. Gabinete ta haña ku e preshon di kuido, kompará ku esun di Hulanda oropeo, no tabata dje pisá ei.
‘Trato inigual’
Hòspital Mariadal i sindikato AFWB ta sorpresá pa e desishon i kada un a manda un karta skèrpi pa Den Haag. “No por neglishá e peliger di infekshon ku e personal di kuido a pasa aden durante e krísis aki”. e sindikato ta skibi na gabinete.
“Pa ekskluí nos personal di kuido sin duda lo lanta un sintimentu di diskriminashon i trato inigual.
GroenLinks ta eksihí aklarashon i a hasi pregunta por eskrito na Kamer. “E kolaboradónan di kuido na e islanan ta para padilanti den e pandemia aki. Pakiko lo bo hasi un distinshon? Mi no ta komprondé”, segun e parlamentario di Hulanda Nevin Özütok. “Mi ta sigui buska igualdat.”
Den e koalishon mes tambe tin hende sorpresá. VVD ta boga pa e islanan karibense aun bini na remarke pa e bónùs di kuido. “Lei pa un, lei pa tur”, parlamentario hulandes André Bosman ta haña. “Nan tambe ta bou di preshon. Meskos ku nos ta yuda empresario aya, sigur nos mester yuda kuido.”
Gabinete: ‘Preshon riba kuido na e islanan ta limitá’
“Pa motibu di e medidanan ku a tuma, e entrada di e vírùs– i ku esaki e preshon riba kuido i e profeshonalnan di kuido na Hulanda Karibense – te aworakí a keda limitá”, asina ta e desishon di minister Hugo de Jonge (Salubridat Públiko). Gabinete asina konsientemente a skohe pa deklará ku e bónùs di kuido no ta aplikabel pa e munisipionan karibense.
Gobièrnu di Boneiru tambe ta eksperensiá e desishon komo doloroso, pasobra e munisipionan karibense den hopi otro tópiko ta sinti nan mes atrasá kompará ku e munisipionan den e parti oropeo di Hulanda.
Último lunanan un 130 hende na Boneiru a infektá. Hòspital ku un kantidat relativamente chikí di personal a hañ’é ku un ‘okupashon apnormalmente grandi’ ku e preparashonnan i e kuido.
Gobièrnu di Boneiru tambe a manda un karta
Diputado Nina Den Heyer (Salubridat Públiko) e siman aki a manda un karta ‘personal’ pa minister Tamara van Ark (Kuido Médiko). “Awor no ta e momento apropiá pa un diskushon di prinsipio”, e ta skibi. “Pero mi por bai di akuerdo kompletamente den e argumentashon di Mariadal i e sindikato ku un kantidat di personal den kuido – meskos ku nan koleganan na Oropa – a hasi un esfuerso ekstraordinario i ainda mester sigui hasi esaki.”
E diputado ta kaba e karta ku un frase remarkabel ku ta indiká kon e no por komprondé e eskoho. “Pa tantu chikí ku e konsekuenshanan finansiero lo ta pa bo ministerio, asina grandi e apresio pa e gesto aki lo ta.”
Segun Den Heyer e intenshon di e karta ta tambe pa sostené e personal di kuido na e dos munisipionan Saba i Sint Eustatius.
