ORANJESTAD – Durante e konferensha di World Press Freedom (WFPC) ku Reino Hulandes a ko-organisá, minister Stef Blok ta bisa ku libertat di prensa ‘tin prioridat apsoluto na Hulanda’. Pero pregunta tokante kon libertat di prensa por haña protekshon na e islanan hulandes karibense, ta keda sin kontesta ainda.
Mas pregunta ku Ret Karibense a hasi durante e konferensha mundial aki ku míles di partisipante a sigui digitalmente, no a haña kontesta. E organisadó ministerio di Asuntunan General, tampoko no a reakshoná ainda riba e preguntanan ei.
Sèn pa protekshon di libertat di prensa56 pais durante e mesa rondó di minister na e WFPC a yega na un deklarashon pa protehá libertat di prensa i di periodista mihó mundialmente. Ademas Hulanda ta reservá 7 mion euro p’esaki. Ku e programa Shelter City periodista bou di menasa por haña lugá pa skonde tambe. Otro aña Unesco, finansiá ku sèn hulandes ta bai duna treinen na polis i otro personal di seguridat tokante protekshon di periodista. Na Aruba diferente media ta indiká ku ta polis mes ta forma un problema. “No tur hende serka polis ta trata periodista bon; tin polis ta komportá masha malu, nan ta bringa i hasi guera ku nos. Serka kuerpo di polis no ta skucha nos. Bosero di polis ta slo i ta tuma parti pa nan periodistanan faborito miéntras no ta informá e otronan”, segun Edmond Croes, direktor di diferente media, entre nan Solo di Pueblo. |
Periodista hulandes karibense for di komienso di e krísis di corona ta pará bou di preshon di tantu e gobièrnunan lokal komo públiko. Ta na Boneiru so ainda no a mèldu e echo aki.
E poder di media sosial
Loke ademas a sali dilanti – i tambe un di e tópikonan di mas importante riba e konferensha WPFC – ta e papel di e plataformanan di media sosial durante e krísis aki. E popularidat ku ta sigui krese ketu bai di Whatsapp, Facebook, Instagram, Twitter i otro plataforma digital ta nifiká ku periodistanan ta pasa mas trabou pa trese nan publikashonnan serka públiko.
Pasobra nan mester kompetí ku tur sorto di informashon i tambe informashon falsu (fake news), mal informashon i lucha kontra atake digital di grupo di usadó. Polítiko i otro interesado por ehèmpel ta usa (i paga) e gruponan aki pasobra nan no ta kontentu ku pregunta krítiko i investigashon independiente di periodista. E gruponan aki konsientemente ta buska pa bòltu opinion públiko kontra prensa. Esaki a sosodé tambe riba Facebook kontra periodista di Aruba i Kòrsou.
Eksperto di privasidat i internèt Marietje Schaake, ku ta direktor di Cyber Policy Center di universidat di Stanford na e konferensia ta bisa esaki: “Awor ta e momento pa laga e poder enorme di e Facebooknan, e Youtubenan i e Amazonnan di e mundu aki, duna responsabilidat. Nan mester duna transparensia tokante kon por ehèmpel e plataformanan aki ta influenshá kondukta humano pa bai usa violensia. E plataformanan aki ta dirigí riba ganashi i no pa protehá salu di hende òf demokrasia.
‘Pais ku ta demandá otro pais pa motibu di nan violashonnan, mester tene nan mes tambe na e standart di mas haltu’
-Marietje Schaake, Cyber Policy Stanford
Mundialmente ta bini mas inisiativa kontra plamamentu (viral) di desinformashon, i kaminda ta tene plataformanan digital responsabel. Manera Trusted News Initiative ku un ‘early warning system’ i un marka di awa digital. Union Oropeo tambe tin un maneho nobo di sanshon kontra pais ku ta violá derecho humano (i libertat di prensa). I asta ta trata di kanselashon di akuerdo di komèrsio.
Schaake ta haña tambe ku mester por pone kondishon na ayudo di desaroyo; ke men invertí solamente den pais ku ta empeñá pa libertat di prensa i no den pais ku no ta hasi esaki.
E eksperto di internet ta remarká si: “Pais ku ta demanda otro pais pa violashon, mester mantené e standart di mas haltu nan mes. Ora komo europarlamentario mi a demandá pais ku tabata konosí pa sera periodista den prizòn. komo promé nan a remarká: boso mes no ta protehá nan na Oropa.”
Mundialmente Hulanda ta kana dilanti pa libertat di prensa, pero na mes momentu minister Blok (ku tambe ta e minister di Asuntunan Eksterior pa e islanan hulandes karibense) ta rekonosé ku ‘no ta tur kos ta bai bon den nos pais’. “Lástimamente periodista na Hulanda tambe ta haña menasa, espesialmente di kriminalidat organisá.” Pero e no ta menta niun kaminda e eventonan e aña aki den sobrá di Reino.
Sekretario di Estado Raymond Knops di Relashonnan den Reino ku na nòmber di minister Slob (di Media) a kontesta pregunta por eskrito di parlamentario hulandes prekupá pa e limitashon di libertat di prensa na Aruba i Kòrsou, tampoko no ke papia di e diferente insidentenan na e islanan. Ademas e no a haña nesesario pa den e kondishonnan pa sosten finansiero na e islanan, inkluí protekshon di libertat di prensa.
Ademas un kantidat di suposishon ku Knops a hasi den e kontesta di e preguntanan aki di parlamento hulandes, no ta klòp. Ora puntra, e bosero ta mustra riba minister Slob ku lo ta trata esaki. Pero djei tampoko no a bini niun kontesta.
‘A gaña tokante mi aresto’“Ainda mi ta okupá ku e konsekuenshanan di mi aresto ilegal”, Sharina Henriquez, periodista di Ret Karibense ta bisa.”Mi ke pa saka mi datonan for di e sistema di polis i un despensa públiko di polis i Ministerio Públiko. Pasobra fiskal a pretendé ku e fiskal ouksiliar no tabata sa ku mi ta periodista. Miéntras ku último ei polis atrobe a konfirmá ku sigur sigur a mèldu esaki mésora. Mi ke un despensa di gobièrnu tambe. Mi aresto no ta pará riba su mes. Promé ku esaki kaba minister Dangui Oduber públikamente a desakreditá mi. Su kordinadó Judelca Briceño asta a bula drenta mei mei den un entrevista ku mi tabatin ku un empresario i a stroba esaki. Gabinete a usa medio públiko pa shusha mi nòmber. E tipo di kosnan asina’ki ta sosodé na Venezuela tambe kontra periodista independiente, djis pa duna un ehèmpel. Wak, mi ta sinti mi mas seif pa hasi mi trabou si mi sa ku otro profeshonal i vigilante di demokrasia ta sostené bo. Otro periodista, pero tambe parlamentario, abogado i por ehèmpel un dosente di lei na universidat. Pero sosten públiko despues di mi aresto a bini solamente di dos media, 24ora i Radio Bo Guia 88.9 FM i di abogado Desiree Croes. Afortunadamente dos miembro di Tweede kamer a sali na mi defensa. Pero ya, naturalmente nan no por denunsiá e komportashon di minister aki. Tambe mi tabata kontentu ku e atenshon di Reporters Without Borders. Nan di ku nan tabata di shòk ku den Reino Hulandes ku su bon reputashon den e área di libertat di prensa, a arestá un periodista. Lástimamente awor a raportá esaki. E temporada di corona pa mi, bon mira, a aklará bon ki importansia Aruba ta duna na demokrasia.” |
