WILLEMSTAD – “Nos a kolektá sigur 1300 regalo di Pasku pa duna e muchanan den bario aki”, Robert de Vries, ku huntu ku su kasá Durkje de Vries ta manehá Fundashon Klein Jeruzalem (Siloam) na kunuku na Kòrsou, ta konta.
Algun aña kaba Siloam ta kolektá regalo pa duna na akohida di mucha di dia den bario. “Hopi di e muchanan aki ta lanta bou di sirkunstansha difísil i hopi di nan normalmente lo no a haña un regalo di Pasku. Nos ta haña ku mucha meresé un regalo di Pasku, ke men nos ta yuda nan un tiki”, segun De Vries.
Outor Kim Hendriksen
Siloam ta un organisashon ku ta sòru pa mucha ku tiki oportunidat, ku tin malesa króniko i terminal den e region di Bándabou, den wèst di e isla. Tambe nan ta yuda hende den e área ku kuminda kayente, pakete di kuminda, paña i kos pa kas.
Sosten henter aña
“Nos tin hopi kontakto den besindario i nos ta traha huntu ku otro fundashon i trahadó sosial pa yuda e famianan ku mester di sosten. Bon mirá nos ta hasi esaki henter aña”, segun De Vries.
Fundashon Siloam ta hasi e akshon di Pasku huntu ku e bon meta Dushi Amigurumi, ku Gerda van Kessel ta manehá. E ta fanátiko di hak i e ta usa su hòbi pa traha pòpchi ku e ta regalá pa bienestar di e muchanan na e isla. “Mi no ta hasi esaki mi so. Mi ta den hopi grupo di hak na Hulanda kaminda mi ta hasi apelashon pa duna pòpchi di hak i otro kos di hunga na e muchanan na Kòrsou”, segun van Kessel.
Kaha yen di kos di hunga
“Ántes nos tabata traha huntu ku e akshon di Pasku ‘Kada mucha un regalo di Pasku’ na un emisora di radio konosí na e isla. Ora ku dos aña pasá nan a indiká ku nan ta bai stòp ku e akshon, huntu ku Siloam nos a kontinuá e akshon”, Van Kessen ta konta. “Bon mirá ta henter aña nos ta okupá ku esaki. Ta manda kaha yen di kos di hunga i pòpchi di hak pa e isla ku nos ta parti den tempu di Pasku pa e muchanan.”