ORANJESTAD – “Lo ta bunita si bini un plataforma pa trese tur inisiativa lokal huntu. Pa asina nos por koperá en bes di tur hende traha komo individuo. Asina nos por reforsá otro i mira kon bo por usa durabilidat komo un total pa promové e isla.”
Hans Plaisier-Janssen, ku huntu ku su kasá ta doño di One Happy Bowl, banda di nan restorant ta kuminsá ku un pakus sin emboltura, Unwrapped Store Aruba. “E ta den e liña di loke nos ta hasi awor. Nos a kuminsá e restorant kaba sin plèstik. Asta nos bòternan di awa ta vegetal, trahá di kaña di suku. Banda di esaki asina nos por kontinuá komo punto sentral pa trese produkto lokal i duradero serka públiko.
Tekst gaat verder onder de video
Outor Sharina Henriquez
Janssen ta bisa ku aktualmente ta falta ponementu huntu di e inisiativanan lokal ku e ta mira ta surgi último tempu. “E plataforma por trese un bista mihó di tur loke ku tin na Aruba kaba i pa nos traha ménos individual. Ke men si bo mester entrega algu un kaminda, un otro (empresario) ku tòg mester kue kaya, por bai kuné pa bo por ehèmpel.”
E empresario ta bisa ku último tempu e ta tende hopi ku Aruba ke hasi mas riba tereno di durabilidat. Pero gobièrnu no ta trata esaki masha konkreto, e ta haña. “Serka nan e kos ta keda mas den plannan. P’esei nos mes ta tuma inisiativa. Nos ta aserká por ehèmpel fundashon di diabétis òf skol kaminda nos ta tene seshon di purba kos di kome òf bebe òf nos ta duna rebaho. Na skolnan e hóbennan por purba nos kuminda pa mira si nan gust’é. Pa asina promové komementu mas salú.”
Banda di esaki nan ta trata mas tantu posibel di koperá ku inisiativanan lokal, Janssen ta bisa “Lástimamente ainda t’asina ku nos no por usa tur ingrediente lokal pasobra nan ta sinku pa seis bia mas karu ku supermerkado. E ora ei pa mi mes si mi ta skohe pa usa produkto lokal, pero pa un negoshi esaki no ta alkansabel tur ora pa apliká esaki. E gastunan ta bira muchu haltu.
‘Black Friday no ta pa gana sèn sino espesialmente pa durabilidat’
Loke sí e kompania ta haña importante pa e isla ta pa tin mas poko posibel shushi di emboltura. “Sigur na un isla chikí kaminda tin un problema grandi kaba ku shushi. P’esei nos ta kuminsá e empresa aki. Nos ta bende produkto seku duradero. Ke men pasta, aros, avena, simia, zeta di oleifi, tur produsí lokalmente. I bo por kumpra e kantidat ku berdaderamente bo tin mester.”
Pa hasi Aruba mas duradero, Janssen ta bisa, bo mester ta kreativo tambe ku e promoshon. “Nos a hasi esaki ku Black Friday. En bes di hasi propaganda pa benta di mas bowl ku dunamentu di rebaho, nos a promové ku serka kada bowl ku nos bende un florin ta bai pa Turtugaruba (fundashon di protekshon di turtuga). Pa asina ku Black Friday enfatisá mas e banda di durabilidat i pa sostené fundashon ku pa e isla ta importante en bes di gana sèn komo meta riba su mas.”
Esaki ta e último parti den e seri Made in Aruba