WILLEMSTAD – Pa por kumplí ku e protokòlnan di salubridat pa motibu di corona, pa e organisashon di elekshonnan di parlamento riba 19 di mart na Kòrsou mester di un mion florin (Nafl) èkstra.
Pacheko Römer riba e fondonan
Esei Pacheko Römer, presidente di ofisina supremo elektoral ta laga sa. “Ora nos a traha e presupuesto, no tabata trata di Covid ainda. Awor nos a kalkulá ku nos mester di 50 porshento bùdjèt èkstra pa motibu di e medidanan di higiena.” A kalkulá 2 mion florin pero mester pone un mion mas aserka.
Presidente Pacheko Römer, presidente di ofisina elektoral supremo Kòrsou – potrèt Dulce Koopman
‘Naturalmente nos no sa ainda kon lo para, tampoko ku e vakuna. Ke men kisas e ta bai ta mihó ku nos a kere i kisas e lo desepshoná. No ta den nos man. Pasobra inisialmente e kos tabata bai bon (ku kasonan di corona, red.) na Kòrsou. Pero awor tòg manera nan ta bisa nos ta den un di dos ola.”
Konseho di minister ta reuní mayan tokante e presupuesto adaptá pa e organisashon di elekshonnan, asina minister Armin Konket a laga sa. E ta konfirmá ku el a haña un karta tokante d esaki di ofisina elektoral supremo.
Mas sentro elektoral
Römer ta splika ku nan a adaptá e programa di elekshon pa evitá kontagio.
Pacheko Römer riba e programa
“E meta prinsipal ta pa evitá e reinan ku por forma aworó na e sentronan elektoral. P’esei nos ta bai harma dies distrito elektoral èkstra pa aworó no tin mas ku 700 pa 750 votadó pa ofisina elektoral pa vota. I ku nos por despachá esaki den diesun ora.
Tambe e ta konsehá e ofisina elektoral supremo pa regla e fluho i distribuí esaki riba e dia. “Nos a papia ofer di esaki siman pasá kaba ku e partidonan polítiko i dia 14 di yanüari nos ta bai sinta na mesa atrobe. Nos ke pa nan konsehá nan partidarionan pa bai vota distribuí riba henter e dia.”
E tradishon di partidario di partido ku ta partisipá ta pa den sierto distrito elektoral bai vota den e último tres oranan promé ku e buzonnan sera, Römer ta konta.”Anto e ora ei bo ta haña hopi hende riba otro loke nos ke evitá.
Un otro tradishon ta e entrega di e listanan elektoral ku ta planeá pa 21 di yanüari. “Normalmente esaki ta sosodé ku hopi folklor, hopi hende, drumband, ets. Pero e bia aki sí esaki no ta permití Ke men lo bira mas ketu ku normalmente.”
Hopi ménos votadó
E kantidat di 116 mil ku ta ferwagt ta hopi ménos ku na e elekshonnan anterior. Tin 4000 persona ménos ku por vota e aña aki. Segun e ofisina elektoral supremo e redukshon aki ta espesialmente pa motibu di emigrashon.
Kuminsamentu di mart ta manda e karchinan. E votamentu riba 19 di mart ainda ta sosodé ku pòtlot. Römer: “Loke Covid a siña nos ta ku nos mester wak un otro sistema di vota. Den futuro no ta ekskluí ku lo por bai vota online.
