WILLEMSTAD – “Mi no sa muchu bon kiko mi mester pensa di esaki ku aworó ata mi para komo estatua na Hulanda, pero ta un honor grandi.”
Esei Maria Liberia-Peters ta bisa pa motibu di e petishon pa estatua komo homenahe na e dos promé ministernan di Antia di mas grandi di ántes, Maria Liberia Peters i Juancho Evertsz.
Kontribushon ekstraordinario na Reino
Gwendell Mercelina Jr. a start e petishon na nòmber di Partido Nashonal di Pueblo (PNP) den koperashon ku Jaap Jonkers na nòmber di CDA, un partido ruman den Tweede Kamer. “E petishon aki ta pa duna rekonosementu i apresio na hulandes kolorido ku a duna un kontribushon ekstraordinario na nos Reino. Ta importante pa pa honra esnan ku meresé esaki i asina traha brùg di rèspèt mutuo”, Mercelina Jr. ta bisa.
‘Nos por ta orguyoso di nos historia konhunto den Reino’
-eks promé minister Maria Liberia-Peters
Liberia-Peters ku ainda ta biba na Kòrsou, ta haña ku ta un gesto bunita. “Ta bon ku asina ta bini mas atenshon pa Yu di Kòrsou ku a hunga un papel importante den e historia di Reino. Na Hulanda, pero tambe aki na Kòrsou lo mester bin hopi mas konsientisashon pa e historia konhunto, pasobra nos por ta orguyoso di esaki.”
E petishon ta kana te 4 di mart.
Tur dos promé ministernan anterior tabata importante den e historia di Reino. “Nos a skohe pa e dos personanan aki pa motibu di e papel prominente ku nan a hunga. Maria Liberia-Peters, polítiko di ántes, tabata e promé minister femenino di promé ku a sinta mas largu di Reino Hulandes. E mester a manehá algun suseso masha difísil manera e baimentu di Shell for di Kòrsou. I Juancho Evertsz ku a fayesé na 2008 na edat di 85 aña, a hasi hopi pa reforsá koperashon den Reino, segun Mercelina jr.
Maria Liberia-Peters (man drechi)
‘Apénas tin estatua di hulandes antiano’’
Segun Mercelina apénas por haña estatua di hulandes antiano, surinameño i indones na Hulanda. Segun e estatua ta duna koló na e bista den kaya i nan ta duna motibu pa kombersá ku otro tokante e historia komun.
“E tempu a yega pa duna atenshon realista den e tempu di krísis aki pa konsultá nos pasado, analisá e tempu aktual, i pensa riba un mihó futuro ku nos aliadonan huntu den un Reino”, asina Mercelina ta bisa.
Online ainda por firma e petishon. Riba djaweps 4 di mart esnan ku a tuma e inisiativa ke ofresé e petishon aki na miembronan di Tweede Kamer i minister di Asuntunan Interior na Hulanda.
 Enith Brigitha Estatua pa Enith BrigithaMester bini hopi mas estatua di hende di koló. Esei e artista Patrick Mezas, ku tin un tayer na Almere, ta bisa. E ta bai traha e estatua di e èks kampion di natashon Enith Brigitha (65) ku a nase na Kòrsou i ya tin hopi aña ta biba na Hulanda. Lesa mas i mira e vidio aki. |
