ORANJESTAD – “No tin motibu pa bira nèrvioso, nos tin un enfoke diferente ku Hulanda pa e pakete di pais i Coho”, e promé minister arubano (demishonario) ta reakshoná riba e relashon ku a daña entre Hulanda i Kòrsou i tambe Sint Maarten pa motibu di e kondishonnan di e fiansanan di corona.
Miéntras Hulanda pa e motibu aki ta sera kranchi di sèn atrobe pa Sint Maarten, Aruba ta keda na mesa trankil. “No t’asina ku nos ta di akuerdo ku tur kos. Tin algun kondishon ku nos ta haña drakóniko. Pero no asina ku nos ta bai for di mesa e ora ei. Nos ta keda na mesa i ta trata di resolvé. Pasobra kon ku bai bini ta pueblo arubano ku ta den nesesidat”, promé minister Evelyn Wever-Croes (MEP) ta bisa.
Si tòg tin hende na Aruba ku ta bira nèrvioso, e ta duna falta di esaki na oponente polítiko ku awor den tempu di elekshon ta bisa sierto kos. “No laga niun hende gaña bo ku ta kita tur kos for di mesa aworó, hala Coho un banda i kibra tur palabrashon. Esaki no ta na benefisio di Aruba, nos tin mester di e sèn.”
Aktualmente Aruba ta palabrando ku Hulanda tokante e di tres agènda di ehekushon pa asina haña e sosten di likides di Hulanda pa e di tres kuartal entrante promé di yüli. Ademas e isla ta na mesa tokante dos lei di reino pa instalá Coho i supervishon finansiero. Segun e promé minister tur dos e trayektonan ta koriendo bon.
“E negosiashonnan tokante e dos leinan di Reino ta bai den bon direkshon. E diskushon ku Hulanda ta riba kontenido i ta sigui e konseho di e Konseho di Estado bon i nos ta masha kontentu ku esaki.”
Na mart a sali ku Konseho di Estado tabatin hopi krítika riba e proposishon hulandes di e lei di Reino Coho, den e liña di e promé protesta di e tres paisnan Aruba, Kòrsou i Sint Maarten. Esta ku, ku esaki, nan mester a entregá muchu hopi outonomia pasobra Hulanda por keda kambia e kondishonnan pa sosten di corona.
Gobièrnu di Sint Maarten for di e negosiashonnan ku Hulanda tokante e kondishonnan – manera instalashon di Coho – semper a kore un kurso skèrpi. Na Kòrsou e aktitut komplasiente a kambia despues di e ganashi grandi den elekshon di oposishon ku anteriormente kaba a ekspresá su mes kontra Coho. E gobièrnu demishonario aktual di Aruba pues ta skohe pa sigui ku Hulanda ainda. Sperando tambe ku aworó na 2022 Hulanda lo rekompensá Aruba pa esaki ku apsolushon (parsial) di e fiansanan di corona. “Pa nos por sali for di e pandemia ku un debe mas abou ku nos tin aktualmente”, promé minister Wever Croes ta splika.
25 di yüni tin elekshon na Aruba. E partido di oposishon di mas grandi AVP a ekspresá su mes kontra Coho i e lei di reino pa supervishon finansiero mas tempu kaba.