WILLEMSTAD – E promé barku krusero a kaba di mara na Megapir na Otrobanda na Kòrsou miéntras Glenda ta drechando su stènt di merkansia. Ta pa promé bia den diessinku luna ku su stènt chikí di bende kos, na Bahia Santa Ana por habri atrobe awor ku tin turista krusero ta yega atrobe.
E ta kontentu ku esaki, pasobra manera e ta bisa, e aña ku a pasa tabata horibel p’é.”Un aña largu mi no por a gana nada”, Glenda ta konta ora e saka su kosnan i hasi su stènt mas atraktivo posibel pa e turistanan krusero. “Tabata un aña masha pisá. Mi ta masha kontentu ku awor tin turista krusero ta bini atrobe, pero nos mester mira kiko lo sosodé, ku Covid ku eseinan. Pero awe mi ta kontentu.”
Outor Kim Hendriksen
Ekonomia
For di 15 di mart 2020 turismo krusero mundialmente a para pa motibu di e pandemia. I esei tabatin konsekuenshanan grandi pa ekonomianan lokal. Den e promé nuebe lunanan di 2019 e turismo krusero a trese 1.6 bion florin den ekonomia lokal. Shafùr di taksi, atrakshon turístiko, sentro di siudat na Punda, pero tambe hende manera Glenda a sintié bon kla den na pòtmòni e último aña i mei. P’esei diferente organisashon ta lucha pa laga e turismo krusero kuminsa kana atrobe na Kòrsou.
“Último diessinku luna nos a traha pa prepará e promé krusero aki”, Vanessa Martie, cruisemanager serka e organisashon di biahe FBTT ta konta. Martie: “Nos tin simannan kaba ta skibi protokòl ku te ayera mester a adaptá ainda.
Restrikshon
Ayera gobièrnu di Kòrsou a laga sa ku a kanselá un kantidat di restrikshon pa turista ku a bakuná dos bia. Esaki tin komo konsekuensha ku e turistanan krusero no tin nodi di keda den e ‘bùbel’ pero nan por move libramente riba e isla.
E desishon aki tin un efekto grandi riba empresario lokal, manera taksista. For di awe turista krusero por djis tuma un taksi i deskubrí e isla nan mes i nan no tin nodi di keda huntu den e bùbel, Esaki ta nifiká ku mas empresario lo probechá di esaki, ke men ta bon notisia”, segun e mènedjer di krusero.
Sí tur hende ku tin kontakto ku e turistanan krusero mester tene nan mes na protokòl severo. Asina tur hende mester ta bakuná dos bia, firma un deklarashon di salubridat delantá i mester tuma nan temperatura delantá. Pa taksista tambe tin regla spesial, asina nan mester bisti tapaboka i e bentananan mester keda habri durante e kareda.
Seif
Sau Bridgewater, bosero di Curaçao Ports Authority (CPA), ta spera ku tur hende ta tene nan mes bon na e reglanan pa asina e promé bishita krusero krea un efekto di bala di sneu. “Nos ke mustra ku turismo krusero ta seif. Nos ta kolaborá huntu ku diferente ministerio pa haña tur e protokòlnan na lugá pa laga e bishita aki bai mas seif posibel. Ku esaki nos ke mustra ku Kòrsou ta seif i nos ta spera di atraé otro kompania krusero tambe,”
Dia 23 di yüni Celebrity Millenium ta bini Kòrsou atrobe. Tambe CPA ta den palabrashon ku otro kompania krusero grandi pa na bini Kòrsou.
Tèst positivo
Djaweps anochi a sali ku dos pasahero di Celebrity Millenium a tèst positivo pa vírùs di corona. E dos pasaheronan for di e salida djasabra di Sint Maarten ta kompartí un kuartu riba e barku, asina e kompania krusero merikano Royal Caribbean ta bisa den un deklarashon. Nan dos mester keda na bordo den karentena por lo pronto. E dosnan no ta malu segun Royal Caribbean.