WILLEMSTAD – For di djaluna 19 di yüli Hulanda ta un área di riesgo haltu pa Kòrsou. Esaki ta nifiká ku tur pasahero por lo ménos 72 ora promé ku na buelo pa Kòrsou mester hasi un tèst di PCR. Esaki ta konta tambe pa hende ku a bakuná i pa Yu di Kòrsou ku a bai di vakashon i ta bolbe.
Asina promé minister Gilmar ‘Pik’ Pisas a anunsiá djaweps. Segun e, tur pasahero na Hato mester por entregá un resultado di tèst negativo. Tres dia despues di yegada tur hende mester hasi un tèst antigeen. Bishitante ku ta positivo mester keda den isolashon dies dia. E tèst antigeen ta obligatorio kaba na Kòrsou.
Epidemiólogo Izzy Gerstenbluth a enfatisá ku for di sifra ta sali ku 93 porshento di e bishitantenan di bèrdè ta laga hasi un tèst asina.
Kòrsou ta introdusí e obligashon pa un tèst PCR no solamente pa motibu di e sifranan ku ta subiendo na Hulanda, sino tambe pa motibu di e subimentu na e isla mes. Kòrsou tin un oumento rápido di e kantidat di kontagio. Riba 7 di yüli a registrá binti kontagio aktivo, riba 14 di yüli esaki a subi bai 102.
Gobièrnu a anunsiá tambe ku lo tene mas kòntròl na kaminda di sali. Ademas Pisas a hasi un apelashon emoshonal na tur hende na Kòrsou pa tene nan mes na e reglanan. Esaki ta nifiká entre otro pa ta mas konsekuente den e bistimentu di tapaboka ora di bishitá pakus i den e espasio públiko i tene nan mes na e reglanan di distansha sosial.
