KRALENDIJK – Boneiru for di 23 di yüli ta subi un nivel di riesgo; di nivel di riesgo 1 pa 2. E kantidat di kontagio último tempu ta subi atrobe i tambe e siman aki a sali ku e variante di corona Delta ta na e isla.
“Espesialmente esnan ku no a bakuná ainda òf ainda no kompletamente, ta kore e riesgo di bira hopi malu”, segun gezaghèber Edison Rijna durante un konferensia di prensa djárason. “Nos ta pidi hende pa tene hopi kuidou.
Boneiru aktualmente tin 17 kontagio di corona. “Ainda no tin hende den hòspital i un gran parti di komunidat boneriano a bakuná. P’esei nos no a disidí di bai un nivel mas haltu di riesgo”, segun Reina
Nivel di riesgo 2 ta enserá entre otro ku tantu paden komo pafó no por kanta ni baila. Tambe restorant i skol di deporte mester registrá nan bishitantenan atrobe.
Motivá hóben pa bakuná
Aktualmente 80 porshento na Boneiru a haña nan promé bakunashon, “Un bunita resultado, pero ku bista riba e variante di Delta ta di gran importansha pa mas hende bakuná”, segun médiko di GGD Marian Luinstra.
Bou di hóben aktualmente 20 porshento so a haña nan promé bakunashon. Kaminda hóben sí por keda hopi tempu ku keho di salú”, segun Luinstra. Ta buska manera pa motivá e grupo aki pa bakuná.
Pa fasilitá bakunashon na skol segun Luinstra no ta un opshon. “Mayor mester duna nan yunan pèrmit i tampoko no nos ke krea preshon di grupo na skol.
No tin konsekuensha pa e bùbel entre e islanan ABC
Por lo pronto no tin konsekuensha pa e bùbel entre e islanan ABC. Persona kompletamente bakuná por bula entre e islanan sin problema. “Pero mester tene kuenta sí ku esaki por kambia un ora pa otro”, segun gezaghèber.
Hulanda pais di riesgo haltu
Un punto di atenshon segun Rijna sí ta ku awor hopi hende ta regresá di vakashon, òf ta bini Boneiru komo turista. “P’esei for di djaluna pasá nos a pone Hulanda riba e lista di pais di riesgo haltu.”
Esei ta nifiká ku e biaheronan banda di e tèstnan di NAAT(PCR) promé ku salida òf mésora despues di yegada, tambe mester tèst riba e di sinku dia di nan estadia. Esaki ta konta tantu pa esnan bakuná komo esnan no bakuná. “Nos mester tene kuenta ku hopi tráfiko na nos Departamento di Salubridat Públiko. Pero nos ta hasi nos bèst pa pèrkurá ku esaki ta kore bon”, Rijna ta bisa.
No opstante kòntròl e ta keda un reto.
Riba e pregunta kon ta supervisá e tèst èkstra aki, Luinstra ta kontestá: “Nos a pensa henter un proseso kaba p’esaki. Hende ta firma un deklarashon di akuerdo na aeropuerto i ora di drenta aki nan ta traha e sita kaba p’esaki. Nos ta yama un parti di e hendenan na telefon tambe pa kòrda nan riba esaki.”
Luinstra ta di akuerdo ku Rijna ku no opstante esaki e lo bira un reto. “Ta trata di algun sentenar di hende pa dia, pero nos ta haña ku ta importante pa protehá Boneiru di e manera aki.