ORANJESTAD – Ku tres minister Croes inkluso e promé minister den e di dos gabinete Wever-Croes, na e presentashon di e tim nobo na prensa tin pregunta tokante nepotismo. E aspirante minister di integridat Ursula Ahrends ta kontestá ku e lasonan familiar aki awor no ta forma un opstákulo pa e integridat di e gobièrnu nobo.
“Aktualmente mi no ta mira esaki. Mester sosodé algu pa mi kambia di opinion. Pero aworakí nò i for di e momento ku nos a kuminsá ku e negosiashonnan pa yega te aki, esakinan a bai na un manera harmonioso, den konfiansa i transparensia total ku otro.”
Esei pues Ahrends ta haña, ku komo minister di e partido di koalishon di mas chikí RAIZ tambe mester bai supervisá e gobernashon íntegro di e partner di gobièrnu di mas grandi MEP, ku tin tres minister Croes.
E gabinete nobo Wever-Croes II tin ocho minister i un minister plenipotensiario na Hulanda. E mayoria di e ministernan (5) di e promé gabinete Wever-Croes ta bini bèk atrobe. Remarkabel ta ku na ora di e anunsio, promé minister (demisionario i tambe aspirá atrobe) Evelyn Wever-Croes ta anunsiá ku e promé hefe di kuerpo di polis femenino, resientemente nombra, Vanessa Tjon-Kock e temporada di gobernashon binidero lo haña un funshon diferente den kuerpo di polis.
“Esaki pa evitá un konflikto di interes awor ku a proponé su kasá Rocco Tjon komo minister di hustisia.”
Tokante otro konflikto di interes i tambe nepotismo, e promé minister ta deklará ku e palabrashon ku tabata na vigor den su promé gabinete, lo keda. Esei ta nifiká ku aparte di e yenamentu di vakatura esensial, tin un paramentu di vakatura pa gobièrnu i famia i amigu segun e no por drenta. Solamente e ministernan ta pèrmití di tuma maksimalmente dos hende di konfiansa den servisio.
Famia ta traha na ofisina di minister
“Tur hende ta komprondé ku mi no ta tuma bisa e ruman hòmber/muhé di Mike Eman (lider di e partido di oposishon AVP, red) na mi ofisina. Si nan ta ámtenar, nan ta bai nan departamento bèk atrobe ora e kuater añanan ku nan tabata minister pasa. Si nan ta bini di pafó di gobièrnu e ora ei nan kontrakt ta bálido te ora nan minister bai.
Ku e palabrashon ei e último kuater aña nan i aworakí tambe basta un kantidat di miembro di famia a bai traha na e ofisinanan di e ministernan. Arends no ta mira opstákulo ei i ta bisa ku e ta konvensé ku tur hende ta tene nan mes na e reglanan di bon gobernashon ku a primintí. “Ademas nos lo pèrkurá pa tene nos na esaki. Esei nos a primintí e votadónan tambe.”
Ret Karibense komo ehèmpel ta duna tambe e potenshal meskla di interes na e kompania di gobièrnu RDA, doño di refineria, awor ku e kartera di minister di energia ta bai pa Glebert Croes. Pasobra e Konseho di Komisario ta bou di presidensia di su ruman Juni (tur dos ta yu hòmber di defuntu Betico Croes, tambe tio di promé minister Wever-Croes.
“Bo tin un punto”, Wever-Croes ta rekonosé i despues ta divulgá: “E palabrashon ta ku esun ku a sirbi mi komo minister i despues komo presidente di konseho, lo baha.”
Ministernan den gabinete Wever-Croes II
Parlamento mester aprobá e lei di nombramentu di e promé 8 puestonan di minister ainda i aprobá e kredensialnan. Asina a presentá nan:
1. minister di Asuntunan General, Inovashon, Organisashon di Gobièrnu, Infrastruktura i Planifikashon Espasial, tambe promé minister Evelyn Wever-Croes
2. minister di Integridat, Naturalesa, Transporte i Kuido di Hende Grandi di Edat, tambe promé vise promé minister
3. minister di Asuntunan Ekonómiko, Komunikashon, Desaroyo Duradero: Geoffrey Wever
4. minister di Finansa i Kultura, tambe di dos vise promé minister: Xiomara Maduro
5. Minister di Hustisia i Asuntunan Sosial: Rocco Tjon
6. Minister di Labor, Integrashon i Energia: Glenbert Croes
7. Minister di Salubridat Públiko i Turismo: Dangui Oduber
8. Minister di Enseñansa i Deporte: Endy Croes
9. Minister plenipotensiario: Guillfred Besaril, nombrá pa konseho di minister nobo