Portrèt: Sharina Henriquez

ORANJESTAD – Diesdos siman despues di e elekshonnan adelantá riba 25 di yüni ku MEP a gana, e mesun partido ku a pone e promé gabinete Wever-Croes kai, a instalá e gabinete nobo Wever-Croes II. Promé minister Evelyn Wever-Croes tin ‘tur konfiansa’ den e tim nobo.

E huramentashon di e gabinete nobo serka gobernador, a tuma lugá sin prensa aserka pa motibu di e espasio limitá i e medidanan di corona.

Djis despues di e seremonia e mandatarionan nobo ta kore den kolumna pa Bestuurskantoor (sitio di gobièrnu) kaminda pa e okashon aki a sera e kaya prinsipal i a pone un tribuna pa asina prensa i públiko por saka potrèt ampliamente. Ta remarkabel ku na e momento ei e reglanan di corona ta suavisá atrobe; ta kita tapaboka ounke ku e ministernan ta para ménos ku 1,5 meter for di otro.

A skohe Rechenell Statie, e siklista hóben prometedor ku kuater aña pasá pa motibu di un outo a resultá den un ròlstul, pa duna su vishon riba e gobièrnu nobo. I esei ta kai den liña di loke anteriormente e simannan ku a pasa durante e formashon di e gabinete a bisa kaba: ‘nos no por nos so, tur hende den e pais mester kontribuí’.

Promé minister Wever-Croes despues ta ripití esaki i ta bisa ku Aruba mester bira mas kombativo kontra e konsekuenshanan di kambio di klima, problema di salubridat públiko i kontratempu ekonómiko.

Prensa no ta haña oportunidat pa hasi pregunta, e mandatarionan ku a kaba di huramentá ta bai paden lihé pa selebrá e instalashon huntu ku famia i otro invitado. Riba un pregunta den Whatsapp di Ret Karibense na promé minister kon e ta haña su tim di minister nobo kompará ku esun anterior, Wever-Croes ta kontestá:

“Mi a eksperensiá e temporada di negosiashon ku e tim di Raiz komo hopi konstruktivo i positivo. Mi tin tur konfiansa ku nos lo logra e metanan ku nos a pone.”

Oposishon ta kontra e nombramentunan
E diesun prioridatnan di gobièrnu e partidonan a divulgá kaba riba 19 di ougùstùs. Riba number un tin pará integridat i bon gobernashon. Pero ta nèt ku esaki oposishon den parlamento, for di promé ku e nombramentu di e gabinete nobo, tin problema. Serka e tratamentu di e kandidatura pa e ministernan djabièrnè pasa (17 di sèptèmber) tur partido di oposishon p’esei a vota kontra e nombramentunan. Nan tabatin falta di e informashon nesesario pa por husga e nombramentunan, manera CV i e relatonan di e screening di e kandidatonan.

Accion 21 durante di e instalashon di e parlamento nobo a indiká kaba ku no opstante ku a pidi e informashon aki, e partido di oposishon no a ferwagt di haña esaki na tempu promé ku e debate di e kandidaturanan. I asina a sosodé. Entretantu e partido a pidi e promé minister i e minister di integridat por eskrito pa e dokumentonan aki.

E frakshonnan di koalishon sí, sin e informashon aki, a vota pa ‘nan’ kandidatonan pa minister i asina tabatin un mayoria sufisiente den parlamento pa duna e gabinete nobo lus bèrdè. E partido di oposishon di mas grandi AVP ta kritiká e desishon aki: “E lidernan di frakshon di MEP i Raiz a falta nan tarea di kòntròl i siegu a duna nan sosten na e ministernan ku e formadó a proponé na gobernador. Ku esaki nan a stòp di ta parlamentario kompetente”, segun e miembro di Staten Ryçond Santos do Nascimentu (AVP).