KRALENDIJK – “Mi mensahe ta kla. Siudadano mester hasi denunsio si violá nan derechonan básiko”, asina Herman* ta bisa. Riba 6 di ougùstùs 2021 el a hasi denunsio kontra e hefe di e Departamento di Asuntunan Sosial i Labor (SZW).
E ta kulpa e hefe personalmente di falsifikashon di dokumentu, insulto, intimidashon, violashon di su derechonan básiko i dañamentu di su bon nòmber. Esaki pa motibu di un artíkulo di Ret Karibense. “Ta sin bèrgwensa kon nan ta anda ku hende”, asina e ta bisa.
Sosten di corona’
Komo trahadó partaim Herman ta den servisio serka un kompania. Ademas e ta traha komo freelancer i banda di esaki e tin su propio kompania sin personal. Pa motibu di e pandemia el a pèrdè su entradanan fiho. Riba promé di aprel 2020 el a hasi un petishon pa supsidio segun e reglanan di sosten di corona. El a haña supsidio i a konsider’é komo ‘èks trahadó, loke no tabata kuadra pasobra ainda e tabata den servisio di e empresa.
Riba 30 di sèptèmber 2020 Herman ta risibí un karta di SZW den kua ta bis’é ku ta stòp e supsidio pasobra e no tabata alkansabel. “Mi no a haña niun telefon di SZW, nan ta gaña”, e ta bisa. Despues e ta haña un karta den kua ta bisa ku riba 5 di òktober Herman lo a bai e bentana di SZW i ei el a komportá sin rèspèt. “Mi no a ba e bentana di SZW. Ta akusá mi sin motibu, unda e prueba ta?”
Segun Herman SZW ta trata siudadano manera ta bobo nan ta. E ta kontra di e desishon di SZW pa no duna supsidio mas, e motibunan ku SZW ta duna pa esaki i e echo ku el a risibí e desishon sin ku a stipulá un fecha. Asina ta masha difísil pa duna opheshon.
Hustisia
Herman a entamá un kaso kontra SZW i riba 6 di ougùstùs di e aña aki korte di promé instansha a trata e kaso aki. Ainda no tin veredikto. “Mi por defendé mi mes, pero kiko ta pasa ku tur e otronan ku no sa kon pa sali pa nan derechonan?”. Herman ta puntra su mes. Idioma hulandes por forma un opstákulo pa tuma paso kontra e organisashon aki.E ta enfatisá ku kada siudadano mester hasi denunsio si violá na derechonan.
Segun Herman dos dia despues ku el a hasi denunsio un polis a yam’é. “E brigadir a bisa mi ku nan a manda e denunsio pa Ministerio Públiko, komo aki ta trata di un ámtenar den servisio”, e ta splika. Den e kaso aki fiskal mester disidí si reshèrshi di Reino ta bai hasi un investigashon.
Polis ta konfirmá e denunsio. “En berdat a hasi denunsio i esaki ta keda na Ministerio Públiko”, Miluska Hansen, bosero di Kuerpo Polisial Hulanda Karibense ta bisa.
‘Ministerio na Hulanda ta na altura di mi denunsio, Te aworakí mi no a haña un reakshon’
No por konkluí for di e denunsio si ta trata di un echo kastigabel. Esei ta e motibu ku no a investigá e denunsio mas aleu”, Roderick Gouverneur, bosero di Ministerio Públiko, ta bisa.
Segun Ministerio Públiko a pone esun ku a denunsiá na altura di e desishon aki. Herman ta bisa ku niun instansha no a tuma kontakto kuné.
Karta ku desishon di Ministerio Públiko
“Mi a ferwagt ku no lo persiguié. Awor mi ta bai kuminsá un prosedura di artíkulo 15”, Herman ta bisa. E ta bai aserka Korte Komun di Hustisia ku e petishon pa persiguí e hefe di SZW. En efekto pa rechasá e desishon di Ministerio Públiko. Pa por kuminsá un prosedura di artíkulo 15 promé Herman mester risibí un karta den kua ofisialmente ta pon’é na altura di e desishon di Ministerio Públiko.
Tantu SZW komo Ministerio Públiko ta bisa ku Herman tin e karta aki, miéntras ku Herman ta ninga esaki.
Abusu di poder
Segun Herman esaki ta un lucha kontra abusu di poder. “Mi tin dies aña ta biba na Boneiru i mi ta sinti mi bonerianu. Mi ke lanta kontra e ámtenar arogante aki di RCN ku ke hunga doño na e isla aki. Nan no tin niun tiki amor pa e isla aki òf e hendenan.
El a hasi e situashon aki konosí serka kasi tur instansha ku tin algu di hasi ku SZW. “E ministerio na Hulanda ta na altura di mi denunsio, mi a manda un email pa e Representante di Reino suplente Jan Helmond. Te aworakí mi no a haña niun reakshon.”
Pa komishon di Tweede Kamer
Kiko ku e desishon di fiskal lo bira, Herman ke sigui. “Mi lo aserká e Komishon di Tweede Kamer fiho.”
*Herman su nòmber kompleto ta konosí serka redakshon”
Kiko ta pasando? Èks kolaboradó ta ekspresá krítika riba SZW: Mal maneho, aktuashon sin pia sin kabes, i basha miónes di plaka
Masumah Hosseini, un kolaboradó di SZW ku tabata okupá ku e bon maneho di uso di sèn for di e medida di emergensia di Covid, ta bisa ku e maneho di e departamento di Asuntunan Sosial i Labor (SZW) lunanan largu a gasta sèn hulandes di impuesto pa falta di kòntròl.
Erik Brakke, hefe di departamento di SZW ta ninga e akusashon: “Kere mi, hulandes no ta regalá sèn asina asina.” Lesa mas: Persona ku ta raportá inhustisia ta kritiká e unidat SZW di RCN