Portrèt: Sharina Henriquez

ORANJESTAD – E programa nobo di gobernashon di gabinete Wever II ta kontené maneho kontradiktorio, espesialmente den e área di durabilidat. Asina gobièrnu arubano ke kumpli ku e tratado di klima di Paris, pero tòg ainda tambe habri e refineria.

Durante e presentashon di e programa, e promé minister i tantu e ministernan di ekonomia/durabilidat komo di naturalesa ta duna tiki klaridat kon por kombiná esaki.

E gabinete ta enfatisá ku ta sigui e metanan di desaroyo di durabilidat di Nashonnan Uní (e SDGnan) ku un balansa entre desaroyo ekonómiko i ekologia. Pero riba término kòrtiku, e promé minister arubano Evelyn Wever-Croes ta rekonosé – i ku esaki e ke men e temporada di gobernashon binidero di kuater aña – ku e énfasis ta riba rekuperashon ekonómiko.

‘Rekuperashon ekonómiko promé’- Evelyn Wever-Croes, promé minister di Aruba

“Promé nos mester rekuperá i e balansa ta ku nos no ta kousa muchu daño na nos desaroyo duradero ni na naturalesa.”

Ménos turista, pero mas konekshon aéreo sí
Den e ehekushon segun e esaki lo mester bai mas fásil awor ku un solo minister ta responsabel pa ekonomia i durabilidat. Pero e minister aki di e partido chikí di koalishon Raiz, Geoffrey Wever, no ta trata ku e sektor di ekonomia di mas importante, turismo. Esei ta keda bou di mando di minister Dangui Oduber di e partido di mayoria MEP.

Esaki promé ku e pandemia di corona ora e tabata minister di turismo tambe den gabinete Wever I a bisa ku e parti di turismo sigur por a sigui krese bira dòbel (3 mion pa aña). No ta menta e kantidat ei mas. Oduber ta enfatisá ku su maneho nobo di turismo no ta bai mas pa kantidat, sino pa kalidat (lesa: ménos turista ku ta saka mas sèn).

Pero den e programa di gobernashon ta pará ku e ke haña mas konekshon aéreo i ku lo ekspandé e aeropuerto hopi. Ademas e añanan binidero diferente hotèl lo habri ku míles di kamber ku mester yena ku turista.

Habri refineria atrobe i proyekto nobo di gas
Minister di durabilidat Wever no ta trata mas ku e maneho di energia, ku ta den man di minister Glenbert Croes (MEP). E tin entre otro komo meta di maneho pa baha e emishon di CO2 ku 45%. Croes ke logra esaki kambiando pa fuente di energia duradero i ménos kombustibel fòsil. Pero kontradiktorio den su maneho: e ta bai invertí tambe den e reapertura di e refineria i un proyekto grandi di gas natural.

Tokante e proyekto di gas natural: gobièrnu lo kontinuá ku e plan pa kambia di zeta pa gas líkido (LNG) komo kombustibel di mas importante. Tambe e ke un lugá di almanesahe grandi. Pa asina por usa un ekonomia nobo komo stashon di pòmp gas pa e region suramerikano.

Pero ekspertonan basta tempu kaba ta di akuerdo ku gas natural, (ku meskos ku zeta krudo ta un kombustibel fòsil) no ta un bon kombustibel di transishon den e lucha kontra e krísis di klima. Un motibu importante ta e riesgo grandi di lèkmentu di metano. Gas natural ta konsistí pa 80% di metano i e gas dañino pa medio ambiente aki ta keinta mundu mas lihé ku CO2.

Ademas na e kumbre di klima na Glasgow un kantidat grandi di pais a palabrá pa stòp ku invershon di gobièrnu den proyekto di energia fòsil. For di e preguntanan na e minister arubano di durabilidat, ku tambe a partisipá na e kumbre di klima, ta parse ku gobièrnu arubano ainda ta keda mira gas natural komo kombustibel di transishon.

‘Di akuerdo pa no invertí mas den kombustibel fòsil’- Geoffrey Wever, minister di durabilidat

“Mi ta di akuerdo sí ku loke a palabrá ei, pa no invertí mas den kombustibel fòsil. Ta p’esei nos fókùs ta riba energia limpi i duradero”, minister Geoffrey Wever ta bisa. Tokante e desbentahanan di gas natural pa e klima, e ta kontestá ku e ta investigando esaki ainda. “Mi mester bisa honestamente ku mi no ta dominá e parti tékniko aki ainda.”