KRALENDIJK – Ku e obra teatral ‘Stop the beating’ e sitio di konseho i notifikashon Guiami ta kuminsá un kampaña grandi kontra violensia doméstiko i abusu di mucha. “E ta konmovedor. Mi a hañ’é emoshonante”, e diputado boneriano Nina Den Heyer ta bisa.
E ta presente na e obra komo eksperto di eksperensia i e ta bisa ku e ta haña teatro un di e mihó maneranan pa por papia di violensia doméstiko i abusu di mucha.
“Investigashon ta mustra ku pa hende karibense teatro, muzik i baile ta e maneranan pa ekspresá kos i tambe risibí kos mihó. Ke men mi ta mashá simpatisadó.”
Reportahe di Marit Severijnse (na hulandes)
E Yu di Kòrsou Archell Thompson ta hunga e papel prinsipal i e mes tabata den un situashon di violensia doméstiko. Ku e obra teatral aki e ke konta ki impakto esaki por tin riba un mucha. Jalisah Moniz di 17 aña di edat ta hunga e papel di su yu muhé.
“Serka Archell bo ta mira e doló ku e ta sinti i bo ta ripará esaki tambe serka e hendenan den sala. Bo ta sinti ku nan tambe a pasa aden, pues bon pa otro hende sa ku nan no ta nan so i ku nan por haña yudansa”, Moniz ta bisa.
Rekonosibel, ku mester suta mucha’ – diputado Nina Den Heyer
Den Heyer tabata haña e obra teatral rekonosibel. “Por ehèmpel ku ta pensa ku e sistema hulandes pa eduká no ta sirbi. Ku mester suta mucha pa nan obedesé. Masha rekonosibel, pasobra hopi di nos ta pensa asina. Pero ta bira mas i mas kla ku maltrato físiko i tambe emoshonal por tin un efekto largu riba mucha.”
Den Heyer mes ta masha konsiente di su eskoho di palabra ora e ta papia ku mucha. “Ta pa motibu di loke mi mes a pasa aden, mi ta pèrkurá pa no hasi nan daño ku palabra.”
‘Mi tabatin miedu di ekspresá mi opinion, pasobra mésora nan tabata haña esei ònbeskòp’- eksperto di eksperensia Solange Martilia
Solange Martilia tambe tei komo eksperto di eksperensia na e obra. E violensia doméstiko ku el a eksperensiá na mucha, tabatin un impakto grandi riba dje, e ta bisa.
“Nunka mi no tabata tribi di duna mi opinion, pasobra mésora tabata mira esaki komo ònbeskòp i esaki tabata stroba mi hopi. Mi tabatin hopi tenshon komo mucha i p’esei nunka mi no tabata tribi di ekspresá mi mes i p’esei awor mi tin disleksia.”
Martilia a yega di papia ku su mama tokante e situashon di ántes. “Mi tabata ke sí pa e sa ki impakto e kos tabatin riba mi, pero mi tabata hasié koutelosamente. Pasobra e tampoko no tabata sa tur ora kon e por tabata un mihó mama.”
Aktualmente Martilia ta traha komo kordinadó Begeleid Wonen (Biba ku Guia) serka Zorg en Jeugd (Kuido i Hubentut) Hulanda Karibense. “Pa motibu di e impakto riba mi mes, mi ke nifiká algu pa hóben i ofresé nan e seguridat ku aktualmente nan tin mester di dje ainda.
‘Mi ta ferwagt ku poko poko mas i mas hende tin kurashi di papia tokante e tópiko’- Martilia
E ta haña bon ku tin mas i mas atenshon pa e problema. “Mi ta ferwagt ku, ku tempu, tiki tiki, por papia mas tokante di e tópiko. Mas hende lo lòs i haña rekonosementu. Mi no ta bisa ku esaki ta sosodé den un tiru, tur kos na su tempu.”
E kampaña di e punto di konseho i mèldu Guiami den koperashon ku otro organisashon di yudansa na e isla tin komo tema ‘bèrgwensa’ i ta dura un aña.