WILLEMSTAD – Un ‘time-out’ pa salba nos pais’. Asina e promé minister di Kòrsou ta anunsiá e medidanan severo kaminda e toke de keda lo bira mas trempan pa di dos bia e siman aki. Hende for di 7 di yanüari for di 10 or no por subi kaya mas anochi.
Skolnan tambe mester keda será mas largu i por habri te 17 di yanüari numa. Pa evitá ku e muchanan ta pèrdè muchu hopi lès, ta kanselá e vakashon di karnaval ta di un siman. Sindikato Doen ta protestá: gobièrnu a tuma e desishon sin deliberashon. Pero segun e minister di enseñansa kurasoleño esei no ta klòp i e sindikato a bai di akuerdo sí.
Otro medida di corona ta: hóreka mester sera mas trempan, (9 or di anochi) i transporte públiko ta stòp di kore 10 or di anochi. Ta retirá tur pèrmit pa evento públiko. No ta pèrmití deporte den grupo, individual sí. Klup di fitness tambe por habri pero ku un okupashon di 50 porshento.
E hòspital CMC ku mester a wanta hopi e siman aki ta haña médiko i enfermero di Merka. Tambe entre 15 i 20 studiante ku ta siña pa enfermero di e estudio di Kòrsou IFE mester bai yuda, gobièrnu a bisa. Anteriormente direktiva di hòspital i e bònt di enfermero tabata kontra di esaki.
Jhonsel Djaoen di e bònt CBV ta konta Ret Karibense ku e ta kontra e proposishon pasobra no tin sufisiente espasio pa guia e studiantenan. “Nan mester di un buddy na hòspital pero pa motibu di e falta di personal esaki no ta logra.”
Pero promé minister Pisas ta bisa ku den un situashon di krísis mester usa tur kos pa aliviá e situashon na hòspital CMC. “Si CMC nenga e studiantenan, mester buska un otro solushon.”
“Por a ferwagt esaki i awor nos mester aseptá e ola aki i konten’é mas tantu posibel, pa e kousa mas poko daño posibel”, imunólogo Ashley Duits ta bisa. E ta splika ku omikron ta kasi manera sarampi, un di e enfermedatnan di mas kontagioso.
“Si tin 100 kontagio di Delta 5 ta bai hòspital. Ku 100 kontagio di omikron 1 ta bai hòspital. Pero si Delta kontagiá 100 hende, omikron ta kontagiá 1000. Ke men ounke e síntomanan ta mas leve, e kantidat total ta mas grandi i esei ta kousa un peso grandi riba e instanshanan di kuido, entre nan CMC. Tambe pasobra bou di e personal tin/ta bini hopi kontagio.”
Djaoen di e bònt di enfermero CBV ta bisa ku yudansa èkstra lo aliviá e situashon na hòspital. Pero ainda no sa si esaki lo yuda. “Nos ta den un situashon dinámiko pues mester wak e kos di un dia pa otro.
Otro instansha di yudansa ta lucha ku un falta di personal pa motibu di e brote eksplosivo di omikron. Raymond Margaritha di bònt di gobièrnu ABVO ta bisa ku e situashon, sigur serka polis, brantwer i duana ta ‘preokupante’.
“Asina un hende kai afó pasobra el a kontagiá, hopi bia dos, tres kolega tambe mester bai den karentena. Esei ta suak e puestonan hopi.”
Mas kòrtiku den karentena
Margaritha ta preferá pa hasi e temporada di karentena mas kòrtiku pa baha e preshon riba e servisionan. Duits ku ta den e tim di krísis ta bisa ku lo evaluá esaki. Na Kòrsou hende ta obligá di bai 10 dia den isolashon si nan a kontagiá i 14 den karentena si nan a bini den kontakto ku un persona kontagiá.
Na Aruba e tempu di karentena riba 30 di desèmber a bira mas kòrtiku pa 5 dia (tabata10).
Ademas ta obligá hende di e mésun kas di bai den karentena. Pues es ku na trabou a bini den kontakto i no tin síntoma, mester sigui traha normalmente.
