WILLEMSTAD – Gobièrnu di Kòrsou poko dia ei a bisa ku nan lo aktua mas severo kontra hende ku ilegalmente ta konstruí òf ta tuma tereno sin pèrmit bálido. Lo atendé tambe ku tiramentu di sushi ilegalmente, entre otro na Sint Joris (Dam Pretu).
Na e sitio e tiramentu ilegal di sushi ya ta un problema di basta tempu. Den e ministerio ta strukturá un tim ku ta bai okupá su mes ku e práktikanan ilegal aki. Huntu ku polis lo aktua severamente kontra infraktor, asina minister Cooper (Tráfiko, Transporte i Desaroyo Espasial) ta bisa.
Joëlle Jochems e temporada ku a pasa a bishitá e área i a papia ku vários habitante di West Groot Sint Joris tokante e problemanan rònt di e kimamentu di sushi ilegal:
Ku gobièrnu ke aktua mas severo segun esnan envolví ta zona bon, pero e habitantenan di Bándariba ( e parti ost di Kòrsou) tin na dudanan. Hende ku ta konfrontá ku e konsekuenshanan di kimamentu di sushi ilegal ta papia di ‘molèster di holó stinki, huma i muskita’. Esaki ta un konsekuensha di kimamentu di sushi ilegalmente. I e problemanan ei ta eksistí basta tempu kaba.
Área turístiko
Tampoko no ta promé bia ku Dam Pretu ta den notisia. E último añanan diferente lugá di tira sushi ilegal a surgi den e área. Na 2018 kaba e parlamentario Giselle McWilliam a hasi pregunta tokante esaki na gobièrnu. Dam Pretu ta un di e lugánan ku ta promové serka turista i p’esei segun habitante, i polítiko, mester kontrolá mihó.
Tambe e problema di kimamentu ilegal di sushi no ta nobo. Na 2015 Ret Karibense a publiká un artíkulo kaba tokante habitante di Koraal Tabak ku tabata fadá di e tiramentu i kimamentu di sushi ilegal den bario i a organisá un manifestashon dilanti di entrada di Sint Jorisbaai. E bario pa motibu di kimamentu di sushi tabatin hopi molèster di huma venenoso.
Pone òrdu
Lástimamente e anunsio di gobièrnu ku lo intervení mas fuerte no ta nobo. Esnan perhudiká ta spera ku minister Cooper (Tráfiko, Transporte i Desaroyo Espasial) ta kumpli ku su palabra i berdaderamente lo aktua kontra e problema. Pero tin duda ku esaki lo sosodé.
Segun habitante di West Groot Sint Joris e kimamentu ilegal di sushi ta visibel klaramente i gobièrnu, si e ke, por intervení fásil kaba. Pero un posibel solushon di e problema ta bini di un fuente inesperá: minister di Finansa: Javier Silvania.
Tira sushi grátis
Prosesadó di sushi Selikor a pidi un fiansa i Silvania ta dispuesto di duna esaki, asina a bira konosí kuminsamentu di aprel. Pero Silvania ta pone un kantidat di kondishon. Un di nan ta ku pueblo por tira sushi grátis un bia pa siman na e kaminda ofisial di tira sushi Malpais.
Mientrastantu ku hende mester paga pa tira sushi, lugá pa tira sushi ilegal ta keda interesante. Si por tira sushi grátis tambe podisé hende lo hasi esei, esei ta e pensamentu tras di esaki. E ora ei no tin motibu mas pa tira sushi ilegal. Selikor ta di akuerdo ku e kondishonnan ku Finansa ta pone, asina Silvana a bisa poko tempu ei.
‘Gobièrnu mester tuma akshon’
E habitantenan di West Groot Sint Joris, pero otro hende tambe ku tin molester di kimamentu di sushi ilegal, ta bisa ku nan ta spera ku e plan nobo tin konsekuensha positivo. “Kisas pòrnada, pero nos ta warda un kambio i nos ke pa gobièrnu tuma akshon”, segun un di e habitantenan di Dam Pretu.
