DEN HAAG – Dylan Romeo (25) a kuminsá un akshon spesial di yudansa pa yuda hende grandi di edat na Den Haag kontra soledat. Ku e sèn trinta hende grandi di edat kada djabièrnè por topa otro. “Ta lástima ku un aktividat asina ta nesesario, pero ta bunita si nos por hasi algu bèk a e generashon aki.
Romeo ku un grupo di hende a bai e eksposishon ‘Kòrsou’ na Nationaal Archief (Archivo Nashonal) na Den Haag i a haña sa ku hende karibense di edat mayó den e munisipio ei hopi bia ta pasa trabou, “Miéntras nos tabata kana den e eksposishon, mi a tene un kombersashon bunita ku señora Noëlle Nieuw. Nos a papia tokante Kòrsou i loke ta uni nos. E ta un miembro aktivo di e grupo di hende grandi di edat Wayaca i a konta mi kon nan ta empeñá pa e komunidat karibense.”
Tabata un kombersashon interesante entre hóben i bieu, Romeo ta konta. “Pero ora mi a pasa serka nan, mi a tende di nan lucha finansiero. Kada djabièrnè ku mas o ménos 30 hende grandi di edat karibense nan ta bini huntu. Nan ta organisá tur sorto di kos: di un atardi kreativo, deporte, wega i informashon. Djabièrnè ta e dia ku nan ta ilushoná pa nan tin nan kontakto sosial. Pero bon mirá no tin sèn pa e aktividatnan.
Sigur den e temporada di corona, e soledat bou di e hendenan a oumentá mas tantu, ta loke Dylan Romeo ta tende. Grupo di hende grandi Wayaca semper tabata risibí supsidio di gemeente, pero pa motibunan deskonosí awor nan no ta haña kasi nada. Ku 600 euro pa henter un aña, bo no por organisá algu agradabel kada djabièrnè.”
E ta spera di haña minimalmente 1.500 euro pa e grupo di hende grandi ku su akshon di yudansa online. “Ku e suma ei en todo kaso nan por organisá bunita aktividat den e tres pa kuater lunanan binidero.”
Biba den soledat na Hulanda
E bida na Hulanda ta mas solitario, Romeo ta mira. “Mi ta ripará ora mi ta na Kòrsou òf na un di e otro islanan, ku hende ta mas serka di otro i mas huntu ku otro. Na Hulanda pa hende grandi di edat ta mas difísil pa drenta den kontakto ku hende. Kon mi ta bai mi famia? Mi por tin aktividat ku otro hende grandi di edat? Nan tin hopi pregunta difísil i esaki ta okupá nan.”
‘Nos mes tambe ora no bira mas grandi por kai den e mésun situashon’
“Ta agradabel pa por hasi algu bèk komo hóben. Na mes momento ta piká ku esaki ta nesesario”, e ta bisa. “Sin e aktividatnan di un grupo di hende grandi asina, e soledat lo sigui oumentá. Ta p’esei mi ta spera ku nos tur por yuda e grupo aki via e crowdfunding, unda ku bo ta.”
Pa Romeo e lucha di e hendenan grandi karibense personalmente tambe ta un konfrontashon. “Nos mes tambe por kai den e situashon aki. E ora ei bo ta spera ku tin otro hende ku ke tei pa bo.”
Karta pa munisipio Den Haag
Huntu ku e grupo di hende grandi el a manda un karta urgente pa e wethouder responsabel i e alkalde di Den Haag. “Mi a pidi nan kariñosamente pero tòg urgentemente tambe pa tuma akshon rápido pa e hendenan grandi aki.”
“Pero lo ta bunita si awor ku e crowdfunding aki nos kolektá minimalmente 1500 euro. Kisas nos tur huntu por pèrkurá pa nan por paga henter un aña di aktividat. Esei si lo ta bunita!”
Si munisipio Den Haag ta bai duna mas supsidia, ta di puntra. Ret Karibense a pidi munisipio i e wethouder pa un reakshon.