Portrèt: Pixabay

14 May 2022 | Marit Severijnse & John Samson

Kralendijk – E kompensashonnan na e munisipionan karibense entrante promé di yüli lo subi algu sí, pero te 2025 nan lo no ta sufisiente pa biba di dje. Esaki a sali for di un investigashon durante di e bishita di minister Carola Schouten di Maneho di Pobresa (ChristenUnie) na e tres munisipionan.

Hopi habitante tin mas ku dies aña ta warda den pobresa ekstremo riba e oumento. Pa por kome tin di nan asta a pone trampa den kurá pa por fangu para.

Partidonan di koalishon VVD, D66, CDA i ChristenUnie no ta riska subi e kompensashonnan mésora na e nivel kaminda si hende por sali ku nan sèn. E miedu ta ku e ora ei lo bini mas inflashon pa e kosto di bida ku ta karu kaba, pasobra e ora ei e suèldu mínimo tambe mester subi. Tambe Den Haag ta pensa ku pa e hendenan na e isla lo bira mas atraktivo pa no traha pasobra bo por biba di un kompensashon tambe.

Bo tambe ke reakshoná? Diskutí riba nos página di Facebook

E krítika ku ta tende hopi ta ku hende ku ya pa añanan largu ta purba sobreviví, atrobe mester tene pasenshi pa motibu di e desishon di minister Schouten. “No t’asina ku nos ta keda sin yuda e hendenan aki”, e minister ta reakshoná riba pregunta di e koresponsal Marit Severijnse na Boneiru.

For di diferente rapòrt i relato personal ta konosí ku hende den e tres munisipionan karibense no por sali ku e kompensashonnan abou i e penshun ku nan ta haña di gobièrnu. Den e último diesdos añanan apénas a bini un kambio positivo den esaki. E kantidat di hende den pobresa asta a oumentá mas.

“E kantidatnan di hende ku ta biba den pobresa ta masha haltu i nos tur mester hasi algu na esaki”, segun Schouten kende ku su desishon pa subi e kompensashonnan un tiki ke ‘oumentá e siguridat di eksistensia’. “Ta importante pa riba término kòrtiku hende sinti algu di alivio den nan pòtmòni.”

Esakinan ta e kambionan entrante promé di yüli 2022
Es ku ta haña ònderstant, por konta ku un 200 dòler kada dos siman. E suma eksakto ta dependé di e isla. Komo èkstra hende soltero ku ta biba independientemente entrante promé di yüli e aña aki ta risibí un oumento di $78 pa luna na Boneiru, $95 pa luna na Sint Eustatius i $93 pa luna na Saba.

Si dos hende independiente biba huntu e ònderstant ademas ta oumentá ku $86 pa luna, $106 pa luna na Sint Eustatius i $104 pa luna na Saba. Pareha e ora ei ta risibí un oumento di $164 total na Boneiru, $201 pa luna na Sint Eustatius i $ 197 pa luna na Saba.

E kompensashon pa yu entrante promé di yüli ta oumentá ku $10 pa yu pa luna. Entrante yanüari 2023 ta bini $10 mas ariba. Anteriormente a anunsiá kompensashon pa yu dòbel pa mayor di yu ku un nesesidat di kuido intensivo. Pasobra e areglo aki por a realisá entrante yüli 2023 numa, e mayornan aki den e aña aki mes por bini na remarke pa un kompensashon.

Kuater relato remarkabel tokante pobresa

Ret Karibense e último añanan a traha diferente vidio, artíkulo i programa di radio tokante kiko pobresa ta nifiká na Boneiru, Saba i Sint Eustatius.

  • Pobresa ku ta hasi doló na Boneiru: ‘Pa por kome awor nos ta fangu para den kurá’ (2022)
    Sentenar di hende a subi kaya den e munisipio Boneiru kontra e maneho di gabinete na Den Haag. E relatonan personal di pobresa grandi atrobe ta hasi doló. Pa por kome tin hende ku awor asta tin un trampa pa kue para den nan kurá. Un ehèmpel di ‘desigualdat’ e habitantenan ta bisa. Pasobra algu asina ta ‘inimaginabel’ na Hulanda Oropeo.
  • Saba: Diputado Bruce Zagers ta duna un entrevista eksepshonal tokante pobresa (2022)
    Kambio di klima ta un problema di luho? Nò, pero tin prioridat, ta sali for di un entrevista eksepshonal ku e diputado na Saba. E pobresa no ta invisibel mésora, pero e ta grandi sí. Miéntras ku ámtenar di Hulanda na Saba por sali masha bon ku nan sèn, ámtenar sabano hopi bia asta mester tuma un trabou aserka anochi i den wikènt. Pasobra e munisipio no tin sèn pa paga e Sabanonan igual i Den Haag no ke yuda. Skucha kapítulo 6 di nos podcast De Vergeten Klimaatcrisis (NPO Radio 1)
  • Ombudsman: ‘Den Haag ta mantené desigualdat di munisipionan karibense’(2021)
    De Nationale Ombudsman, ku un krítika pisá, ta hasi un apelashon urgente riba miembronan di parlamento hulandes pa porfin trata e pobresa i desigualdat den e munisipionan karibense. “Basta ku e kosnan ridíkulo aki!”
  • Nuebe aña di bishita di Den Haag na Boneiru: Pakiko e kombatimentu di pobresa ta keda atras? (2019)
    Polítikonan hulandes ya pa añanan largu ta konfrontá ku e pobresa di Boneiru. Pakiko ainda tin asina poko progreso?