Portrèt: Pixabay

DEN HAAG – E partidonan di koalishon D66 i CDA ke pa akohida di mucha na e munisipionan karibense aun bira grátis. E gabinete hulandes ke pa e munisipionan Boneiru, Saba i Sint Eustatius mes kontribuí na pago di esaki, pero mas i mas partido no ta di akuerdo.

D66 i CDA ke pa sekretario di estado Alexandra van Huffelen (Relashonnan en Reino) wak di nobo si gabinete hulandes por supsidiá e akohida di mucha shen porshento.

Boneiru ke akohida di mucha grátis ‘kon ku bai bini’
Gabinete hulandes pa mas tempu kaba ke pa mayornan mes tambe kontribuí na e gastunan pa akohida di mucha. Munisipio di Boneiru ta resistí e plan ei. “Asta si ta solamente 5 dòler pa luna, ainda e ta keda ta un mal plan”, diputado Nina den Heyer (Asuntunan Sosial i Bienestar) a bisa anteriormente.

Segun e diputado mayornan ku tin problema finansiero, ainda ‘lo kumpra kuminda pa duna nan yu mas lihé ku nan lo saka e sèn ei pa akohida di mucha’. Hopi mayor ku ta traha ta laga nan yunan mas grandi wak i chikitunan.

Awor tin sosten for di CDA tambe
Akohida di mucha mester bira grátis na e munisipionan karibense sí òf nò? Ta esaki ta palabrá na Den Haag ya pa 2 aña kaba. Miembro di parlamento di D66 Jorien Wuite durante un deliberashon den Tweede Kamer a pidi atenshon pa esaki. “Tin e posibilidat pa hasi akohida di mucha grátis?”

‘Sinku porshento na Boneiru ta nifiká relativamente hopi sèn pa e mayornan’

Awor CDA tambe ta djòin e plan. Segun e miembro di parlamento Joba van den Berg gabinete hulandes mester tene mas kuenta ku e situashon ku e hendenan na e munisipionan karibense ta biba aden. “Sinku porshento ei, ta nifiká relativamente hopi sèn pa e mayornan. Pasobra e preisnan ei ta diferente.”

Van den Berg ademas ta pensa ku un kontribushon obligatorio no tin masha sentido, pasobra gobièrnu despues mester hasi gastu pa hasi e atministrashon di e kontribushon di mayor. “Tòg lo mi ker a pidi e sekretario di estado pa djis wak esaki mas pragmátikamente.”

Partidonan di oposishon PvdA, Groen Links, Partij voor de Dieren i Bij1 ta sostené e plan pa akohida di mucha grátis. Pero e pregunta ta si tin sosten tambe serka e dos otro partidonan di koalishon VVD i ChristenUnie.

’25 mion èkstra’
Boneiru ta kere ku e eskoho di previshon básiko pa e munisipionan karibense lo kosta 25 mion èkstra. “Esakinan no ta suma ku lo spanta Hulanda”, segun diputado Den Heyer.

Gabinete hulandes ke laga gobièrnu di Reino paga te 95 porshento di e gastunan. Segun sekretario di estado Van Huffelen e tres munisipionan karibense mes por disidí si nan por paga e sobra sinku porshento di nan propio bùdjèt di munisipio. “E espasio ei tei”, sekretario di estado Van Huffelen ta bisa.

Polítika na Boneiru tin krítika riba esaki pasobra e previshonnan sosial ta kana atras kompará ku loke hende ta haña den munisipio hulandes na Oropa. Den e munisipionan karibense hende ta haña ménos ònderstant, no ta eksistí kompensashon pa desempleo i mayornan mes mester paga enseñansa spesial pa yu ku adhd, ku outismo, òf altamente inteligente.