DEN HAAG – Un den tres persona hulandes karibense ta eksperensiá diskriminashon na Hulanda, a sali for di investigashon di CBS. “Sòru pa bo sa kiko bo ta hasi si bo ke muda bai Hulanda”, e instansha ku ta sali na interes di hende karibense, Ocan, ta avisá.
Di e hulandesnan di desendensia karibense”, 33 porshento ta indiká ku a yega di diskriminá nan. Entre hende ku solamente un desendensia hulandes esaki ta 8 porshento.
“Pues mas ku 60 mil hulandes karibense a eksperensiá diskriminashon”, e presidente di Ocan Lionel Martijn ta reakshoná. “Tambe si bo wak e otro gruponan, bo por konkluí ku hende pa motibu di nan koló òf desendensia tin difikultat na Hulanda.”
Martijn siman pasá a papia den parlamento hulandes durante e kombersashonnan di e pasado di sklabitut. “E ora ei mi a bisa ku ta den nos DNA pa diskriminá i distinguí. Esaki ta sali den práktika atrobe, si nos mira kiko CBS ta bisa.”
‘Bai bo pais bèk’
E sifranan mes ta papia. “Ta trata di trato inigual, diskriminashon, stigmatisashon i rasismo”, e ta ripará den práktika tambe. Pasobra ainda Ocan ta tende diferente relato di hende karibense tokante loke nan mester tende na Hulanda. “Por ehèmpel nan ta tende: bo no por. Òf: bai bo pais bèk!”
“Gobièrnu lo mester hasi mas esfuerso pa splika pakiko sierto grupo di hende, manera nos, t’aki na Hulanda”, e presidente di Ocan ta haña. Martijn ademas tin molèster di e manera ku ‘media hulandes ta frame i ekskluí nos hendenan’, e ta bisa.
‘Sa kiko bo ta hasi ora bo ke muda pa Hulanda’
Ocan ta haña ku e hendenan na e islanan mester pensa bon tokante e idea di muda pa Hulanda. “Pensa bon promé ku bo hasi un kos”, segun Lionel Martijn.
“Pensa kiko bo ta hasi si bo skohe di biba den un komunidat ku no ta esun di bo. Sa ku por diskriminá bo, loke no ta bon.”
E karibense ku ta atendé interes a kuminsá ku treinen ‘pa hasi nos hendenan mas kombativo’. “Loke ta enserá: bo no tin nodi di tuma tur kos, pero no laga e diskriminashon ei molestiá bo. pasobra e ora ei bo tin hopi molèster di esei, pero esun ku ta hasi e ponensianan ei sí ta sigui biba normalmente.
‘Ta tristu ku tin asina poko notifikashon’
“E di mas tristu ta ku tin tiki notifikashon ta tuma lugá”, segun Martijn. Solamente nuebe porshento di e hendenan ta hasi esaki, a sali for di e Mónitòr di Seguridat. “Nos a trese esaki dilanti tambe na e ministerionan. Mester bini un portal, kaminda ta mas fásil pa hende pa mèldu. Despues nos ta guia nan pa e diferente instanshanan pa ademas hasi algu spesífiko ku nan keho.
“Loke mi ta haña preokupante, ta ku hopi di nos hendenan karibense na Hulanda no tin konfiansa den e instanshanan ku nan tambe ta paga impuesto p’e”, e presidente di Ocan ta bisa. “Ademas ta duna e impreshon ku tur hende karibense ta kobradó di ònderstant. Ta masha simpel: nan meresé e servisio meskos ku tur otro hende na Hulanda ta haña.”
Ocan ta apelá na hulandes karibense pa mèldu mas tantu den kaso di diskriminashon, pasobra nan ta teme ku tiki lo kambia miéntras tantu e sifranan i estadístikanan no papia pa nan mes. “Ora mi sinta na mesa serka e ministerionan òf kualke instansha, nan ta bisa ku ta ménos di loke a kere. Ku ta bo fantasia, miéntras ku no ta asina. Por fabor, hasi denunsio.”
“Bo por bai polis i den diferente siudat tin punto pa mèldu, manera e ofisina di Artíkulo 1 òf yama Ocan. Pon’é serka nos pa asina nos por yuda bo yega na e bon lokètnan”
‘Ku diskriminashon e problema ta bira mas grandi’
Banda e diskriminashon ku ta okurí mas ku promedio, Ocan ta mira ku hende karibense tambe ta keda atras na diferente manera na Hulanda. “Nos hendenan ta biba den kas mas malu, nan ta bai skol mas malu i hopi bia nan tin trabou mas malu.”
“Hopi hende karibense ta traha bou di nan nivel no opstante ku nan tin un edukashon hbo òf wo. Djei nan ta resultá den mal bario,. Ei e previshonnan ta mas malu i e hendenan no ta haña e atenshon nesesario i p’esei nan ta kai mas leu den problema.