E aktitut di prensa hulandes durante e bishita di famia real na e partinan karibense di Reino no ta niun tiki real pa periodista arubano. Na diferente sitio nan mester hala un banda pa periodista hulandes.
Periodista arubano durante nan trabou ta ripará ku Rijksvoorlichingdienst (RVD, Servisio di Informashon di Reino) ta duna media hulandes preferensia pa traha ‘shòt bunita’. Segun periodista arubano no ta trata di insidente, sino ta un patronchi.
‘Nos tambe ta hasi nos trabou’
“For di ora ku famia Oranje a yega na Wilhelminaplein por a ripara iritashon kaba serka miembro di e tim di desaster”, koresponsal Melissa Stamper ta konta. “Nan mester a guia e programa den bon direkshon, pero prensa hulandes hopi bia no ta tene nan mes na protokòl. Asina por ehèmpel nan mes ke stipulá unda nan ta para ora di yegada di rei.”
Stamper ta konta ku un tiki mas leu riba e ruta e hendenan ta kuminsá eksitá atrobe den e lugá pa prensa dilanti di e edifisio di parlamento. “Diferente bia ta pidi ami i otro periodista arubano urgentemente pa hala un banda, pa prensa hulandes por saka ‘shòt bunita’. Kaminda prensa arubano tambe a registrá pa sigui e bishita di kas real i tin e mésun derechonan ku prensa hulandes.”
E petishonnan pa hala no ta bini di e periodistanan hulandes sino di Servisio di Informashon di Reino (RVD).
Koresponsal Stamper ta tende RVD ta pidi e emisora di televishon nashonal arubano tambe pa hala pa un emisora hulandes.
“Nos tambe ta hasi nos trabou”, un cameraman arubano ta reakshoná. “Nos a keda para kaminda nos tabata i nos no a aster nan.”
E iritashonnan ta sigui oumentá
Riba e di dos dia di e bishita na Aruba e situashon ta eskalá serka e parke reservá di naturalesa Arikok. Kasi ta detené dos periodista hulandes pasobra nan no ta tene nan mes na e medidanan di seguridat. Nan ta hala atras te ora numa e hefe di RVD mustra nan ariba ku e outoridatnan arubano ta kompetente pa arestá nan.
Mas lat na e fábrika di áloe e kos ta bai malu atrobe. Tin un konflikto entre polis arubano i algun periodista di Hulanda. For di e momento ei ta surgi un atmósfera menasante entre e grupo di periodista arubano i e periodistanan hulandes. “Por a sinti esaki tambe na e otro sitionan ku Oranjenan a bishitá”, nos koresponsal ta konta.
“Ta pusha mucha un banda”
Un mayor ta reakshoná riba e página di Facebook di promé minister Wever Croes riba un potrèt kaminda prensa hulandes ta posa. “No muchu kontentu ku e komportashon di sierto hende. A pusha e bailadónan un banda na San Nicolas, i asina a pone ku e presentashon no a bai masha bon. Mi yu tin diesdos aña di edat i nan a pusha e tambe un banda.”
“Mi yu tambe a konta mi tokante nan komportashon” un otro persona ta reakshoná. “Nan ta hasi manera ta nan ta doño di Aruba.”
Iritashon bou di ámtenar arubano
Tantu outoridatnan arubano komo e komishon di gobièrnu ku ta atendé ku e programa ta konfirmá e eksperensianan di e periodistanan arubano. E presidente Nicole Hoevertsz tin bia ta papia di un ‘atmósfera di tenshon’ serka prensa. “E komportashon di prensa hulandes tin bia sí ta kousa problema. Polis tambe a indiká esaki.”
‘No ta insidente, ta un patronchi’
Koresponsal Sharina Henriquez pa di tres bia ta reportá un bishita real na Aruba. “Asina na 2006 ku e bishita di reina Beatrix mi a eksperensiá ku RVD tabata atmití prensa hulandes na sierto sitio i nos komo prensa arubano mester a keda pafó. Mi a skibi tokante esaki tambe e tempu ei.”
“Mi ta ripará e bia aki atrobe ku Servisio di Informashon di Reino hulandes ta duna preferensia na prensa hulandes”, Henriquez ta bisa.
“Nos ta haña ku esaki no mester por a sosodé i nos a trata di drech’é”, presidente Hoevertsz di e organisashon arubano ta bisa tokante esaki. Nos a insistí ku si un kaminda dos hende di prensa hulandes por a drenta, e ora ei dos arubano tambe por drenta. Ora ku den práktika a sali ku no tabata asina, mésora nos a remarká esaki serka RVD.”
Servisio di Informashon di Reino ta ninga e reprochenan
Ret Karibense tambe a hasi pregunta na Servisio di Informashon di Reino, ku pa kas real ta manehá e bishita i prensa Hulandes, Riba esaki RVD ta bisa ku ‘nan no ta rekonosé nan mes’ den e reproche ku ta duna algun media hulandes preferensia.