Prome minister di Aruba Evelyn Wever-Croes a papia cu secretario di estado Alexandra van Huffelen (Koninkrijksrelaties) tocante e morto di Nigel Hill. E kier haya contesta pa e famianan na Aruba.
Nan ta sospecha e compañero di cel di a mata Hill den e prizon di Krimpen aan den IJssel. Helga Hill, e mama di Nigel (24), no ta comprende dicon a dicidi di pone su yiu hunto den cel cu un hende cu a haya TBS pa un asesinato.
Ta e prome biaha cu un detenido cu a haya un castigo di TBS, a mata un compañero den su cel. E mama kier pa politica na Hulanda tuma medida pa algo asina no sosede mas. Tambe e ta bisa, cu keto bay e tin hopi pregunta, sin haya contesta.
“Riba nivel di gobierno, a tuma contacto cu gobierno Hulandes”, minister-president Wever-Croes ta bisa durante su bishita na Den Haag.
E mama tambe ta puntra dicon husticia a tarda dos dia pa inform’e cu nan a haya su yiu homber morto den su cel. “Esey tambe ta un pregunta cu nos a haci na Hulanda”, Wever-Croes ta bisa. “Esey a hasi e mama extra dolor.”
“Mi a comprende, cu si algo asina na Hulanda ta sosede, ta riba e mesun dia e famianan ta haya sa. E mama ta indica cu caminda e persona tawata deteni, nan tin su contact. Pues cu a tarda dos dia, esey ta algo cu a hasi hopi dolor. Nos no a haya contesta riba e pregunta ey ainda.”
Otro siman lo papia atrobe cu Hulanda
“Mi a papia tocante di esaki cu secretario di estado Alexandra van Huffelen. El a priminti di su parti cu e ta bay follow-up, pa asina cu ora minister (di husticia) Rocco Tjon tey na Hulanda otro siman por atende e temanan aki.”
“E famia ta den dolor hopi grandi. Y a compromete cu lo informa e famia ora tin mas informacion. Te cu ainda nos no tin un update di e investigacionnan.”
“Irespecto e circunstancianan, e ta keda un ser humano cu ta asesina. Pues e ta algo teribel. Nos tur tin cu purba pa cosnan asina no tuma lugar.”
“Nos a comprende cu tin investigacion andando aki na Hulanda. Uno na kico a pasa. Y otro, un investigacion penal.”
“Nos no a haya e resultadonan di investigacion ainda. Nos ta pendiente di esey, pa e ora ey mira si tin cu tuma otro pasonan si of no.”