Banda di mitar di sinku di atardi algun desena de hende ta bini huntu na e playa di Marí Pampun, un tiki mas leu ku restorant Surf & Turf. Ta kaminda dies aña pasá a tira e polítiko di Kòrsou Helmin Wiels mata.
E interes pa e konmemorashon ta manera e konmemorashonnan anterior, no masha grandi. Pero e ‘Amigunan di Helmin’ ainda ta sinti su falta tur dia.
Edward Joseph ta èks presidente di Pueblo Soberano (PS), e partido di Wiels. “MI no ta kere ku den mi bida ainda lo mi topa un hòmber manera Wiels. Hende asina ekstraordinario ta un bia den 50 aña nan ta pasa.”
Ingrid Sanchez, sekretario di partido for di kuminsamentu ta bisa ku e ta kòrda bon e promé bia ku el a topa ku Wiels. “E tabata un hòmber masha ekstraordinario ku no tabata pèrdè kurashi, ku tabatin e mihó intenshonnan pa pueblo.”
‘Kòrsou ta bai mas malu ku nunka’
Melvin ‘Mac’ Cijntje – un di e ko-fundadornan di e partido PS – ta bisa ku aktualmente Kòrsou ‘konosé mas korupshon ku ‘dies aña pasá. E ta menta un seri di skandal, di sosten di miónes pa e kompania di aviashon Insel Air i Girobank, (‘pa kua niun hende no a bai será’).
Pero tambe korupshon serka e refineria di Kòrsou, tambe rònt di e negosiashonnan ku Caribbean Petroleum Refinery (CPR), miónes di e benta di UTS ku a disparsé. I loke ta hasi Cijntje mas doló: E kantidat di miónes ku a disparsé den konstrukshon di e hòspital nobo CMC.
“Si Wiels tabata na bida ainda lo no a yega asina leu nunka. E ora ei asina tantu sèn lo no a resultá den saku robes”, Cijntje ta haña.
Edward Joseph – èks presidente di Pueblo Soberano (PS), e partido di Wiels – ta papia ku e presentenan na e playa di Marie Pampun (potrèt: Oscar van Dam)
E konstrukshon di e hòspital a kuminsá bou di responsabilidat di un minister di PS. “Pero asta asina Wiels lo a reakshoná i lo no tabatin asina tantu asuntu straño rònt di e hòspital; por ehèmpel pakiko awor tin seis piso? Miéntras e plan original tabatin tres piso”, Cijntje ta bisa.
E polítiko ta apelá pa koperá i konstruí un Kòrsou nobo i mihó, ‘pa nos yunan’. “Hala tur miedu un banda. Nan no por mata nos tur.” E ta haña aplouso. Tambe di e ministernan presente i parlamentario di otro partido.
Desunion bou di sostenedó
Na e enkuentro ta desvelá un plakat i un monumento di pieda, ta deklamá poema di Helmin Wiels i ta kanta huntu.
Djabièrnè meinta otro èks partidario, entre nan èks promé minister Ben Whiteman a tene un propio enkuentro. Ruman hòmber Aubert Wiels a yama e enkuentro di e ‘grupo di amigu’ gañadó i ta rechasá e enkuentro.
E falta di union ei ta un parti importante di e herensia di un tempu ‘e polítiko di mas popular’ di Kòrsou. E partido, su obra di bida, despues di e asesinato a dekaí. Famia, amigu i partidario a haña guera serio.
Ainda no tin un motibu pa e asesinato
E echo ku tin tres hende será pa e asesinato, no a drecha e situashon. A kondená èks minister di Finansa George Jamaloodin (MFK) pa 30 aña pa provokashon. ‘Mákelar di asesinato’ Burney Fonseka a haña 26 aña den sèl i Elvis Kuwas kastigu di bida largu pa diferente asesinato, entre otro e asesinato pagá di Wiels.
Nunka Jamaloodin i Fonseka no a duna e motibu pa e asesinato. Tur dos ta ninga ku nan tabata envolví den e asesinato polítiko. Na Kòrsou tin hopi rumor tokante e motibu pakiko a paga sèn pa mata Wiels. Asina kompania di wega di plakal, òf hende ku interes den telekomunikashon lo tabata tras di e asesinato.
‘Hasié un konmemorashon anual di 5 di mei’
Durante e konmemorashon no ta papia di esaki. Ta konmemorá Wiels komo héroe polítiko, profeta sosial i espesialmente komo lider di pueblo di Kòrsou. Èks presidente di partido Joseph ta proponé pa anualmente riba 5 di mei rekordá loke Wiels a nifiká pa Kòrsou.
“Tur e otro dianan di aña lo tin sufisiente lucha i pleitu. Riba sinku di mei nos mester tuma un sosiegu un ratu i rekordá tur loke el a hasi pa nos.
