Na diferente sitio na Kòrsou ta kita naturalesa pa traha kas nobo i atrobe esaki ta kousa krítika. A bira tempu pa parlamento trata e plan di destino ku tin mas ku 100 aña bieu kaba, Melvin Cijntje di Dienst Openbare werken ta haña.
Atrobe na Kòrsou a lanta un diskushon despues ku a bira konosí ku un desaroyadó di proyekto ke bai konstruí riba un tereno di naturalesa. Segun e krítika riba social media atrobe ta sakrifiká naturalesa pa kas grandi karu.
Den e Plan di Desaroyo Insular (EOP, Eilandelijk Ontwikkelingsplan) a determiná legalmente unda na e isla por konstruí i ku kua meta. Segun minister Cooper (VVRP) gobièrnu mester aprobá un plan di konstrukshon normalmente si e ta kumpli ku lei. Sino lo sigui kleim di daño, e ta alertá.
Krítika riba polítika
E krítika ku ta tende hopi riba polítika ta hustu? Cijntje ta pensa ku sí. A pensa e sistema mas ku shen aña pasá (entre 1916 i 1926) i for di e tempu ei apénas el a kambia. I awor den e plan di destinashon ‘moda bieu’ ta tene muchu tiki kuenta ku naturalesa, e ta bisa. Pió ainda, for di 1997 EOP mester a haña un ‘update’ tres bia kaba.
Segun Cijntje gobièrnu den futuro no mester laga e evaluashon pa su huristanan , sino por ehèmpel pa arkitekto ku tin hopi konosementu di naturalesa i paisahe evaluá esaki.
“Ta eksistí manera moderno kaminda tin un balansa mihó entre e destinashon di un área i e kalidat d e urbanisashon – kon nos ta bai konstruí den e mesun área”, Cijntje ta bisa. “Konstruyendo mas kompakto ta keda mantené naturalesa.”
Kon ta sigui awor?
Ta na Staten pa entregá un proposishon di lei òf adaptashon di e EOP. Tambe minister Charles Cooper (VVRP) for di gabinete mes por bini ku un proposishon.
Anteriormente kaba a papia den parlamento di un plan di destinashon nobo i moderno. E partidonan polítiko PS i PAIS na 2015 a trese e asuntu dilanti. Cijntje tambe a hasi esaki komo èks miembro di Staten pa PS.
Moshon pa EOP nobo
Na novèmber di 2016 a tuma un moshon pa pèrkurá pa tin sèn (‘1 mion florin i si ta nesesario mas’) pa traha un EOP nobo.
Segun e moshon ku e sèn ei un grupo di eksperto por a kuminsá traha. Banda di esei di kada partido polítiko un parlamentario lo a tuma asiento den un komishon spesial pa ‘monitòr’ e desaroyonan. E moshon pues no a kondusí na un plan di destinashon nobo.
