Djarason tabata tin e promé manifestashon na Kòrsou kontra e atakenan di Israel riba e teritorio palestino. Un grupo di un 30 hende a demostrá na Wilhelminaplein. Ta bai tin mas manifestashon, e organisadónan ta bisa.
E grupo a konmemorá ‘tur e bidanan ku a pèrdè na Palestina, innesesariamente i kruelmente’, segun Tony Espineira, un di e organisadónan. E manifestantenan ta grita ‘peace right now!’ i despues un di nan ta haña e mikrofon pa hasi un orashon na árabe.
‘Stop ku e atakenan!’
Na e manifasteashon tin diferente Yu di Kòrsou presente i di diferente background, manera kristian, hudiu, musulman i ku no nesesariamente lo yama nan mes kreyente.
Foto: Dulce Koopman
Tin diferente bandera di Palestina i bòrchinan: ‘Free Palestine’, ‘Cease war now’ i ‘Stop killing now’.
“Nos deseo ta simpel”, Espineira ta bisa. “Nos ke un cease fire; stòp ku e atakenan. Nos kier un Palestina liber pa asina nan por biba na pas ku tur nan bisiñanan. Pa nan por disfrutá di e derechinan ku nos tambe na Kòrsou ta disfrutá di dje.”
‘Porfin protesta na Kòrsou tambe’
Un di e manifestantenan ta Talitha Marsman, ku ta bèk na Kòrsou for di ougùstùs. “Na Hulanda tin diferente protesta i por fin awor aki na Kòrsou tambe.”
“Mi ta sinti mi un tiki tristu di kiko ta pasando na Palestina, pero tambe empoderá di wak tur e hendenan ku a bini pa laga sa ku no ta bon kiko ta pasando einan i ku nos no mester keda silensioso.”
Rhoda Barton tambe a bin na e manifestashon. Su partner ta libanes, e pais ku ta bisiña di Israel, e ta konta. “Na Kòrsou nos tin diferente hende ku background libanes, tambe palestino i árabe.”
“Hopi biaha hendenan ta preferá di tene nan mes reservá”, ta lokual Barton ta ripará. E ta sinti ku ta su deber p’e duna sosten. “Ta difísil pa mira e situashon aya, paso aki na Kòrsou nos tur ta atende ku otro masha bunita mes, ku tur nashonalidat ku nos tin akinan.”
Pa Barton ta importante pa manda un señal ora e mira ‘inhustisia’. “Ta nos rumannan. E palestinonan tambe ta hende. No ta dushi pa mira kon nos ta hari aki, i otro ta sufriendo aya banda.”
| Mas manifestashon na kaminda Talitha Marsman ta spera ku e manifestashon di djarason ta un komienso. “Mi ta spera ku e kos aki ta bira mas un movement; no djis un anochi. Nos tin un protesta kaba ku nos ta organisando pa djasabra.”“Nos ta kuminsá 4’or di atardi na Riffort, kana bai Wilhelminaplein”, segun Tony Espineira di e organisashon.E ekspektativa ta ku lo bai tin mas hende, segun Espineira. “Mi ta kontentu di mira ku últimamente nos komunidat, i mi sernan kerí tambe, a kuminsá realisá kiko ta pasando aktualmente na Palestina. Algu ku pa hopi aña no tabata bisto via media aki. Dor di social media aworaki si.” |
‘Gobièrno di Kòrsou mester papia’
Den nos Reino Hulandes, ta un minister di Eksterior so tin na Den Haag ku ta aktua na nòmber di Hulanda i alabes di tur seis isla. Segun e diferente manifestantenan, a yega tempu pa gobièrno di Kòrsou bini ku un statement.
“Nos team ta bai hasi un petishon na gobièrnu”, Espineira ta splika. “E idea mas great ta pa gobièrnu di Kòrsou lanta su bos, bisa ku nos no ta di akuerdo ku loke ta pasando. Mi ke pa nan pidi nos rumannan na e otro islanan i na Hulanda, pa por fabor lanta para i bisa: stòp ku e kos aki, awóraki.”
