E velosidat di tráfiko ta muchu haltu, hende no ta para mas na lus kòrá i na un sitio spesífiko na e isla e chèns pa outo dal bo mata ta remarkablemente grandi. ”Kuantu morto mas mester kai na Kòrsou promé ku algu sosodé?”, asina eksperto di tráfiko Tico Ruiter ta puntra.
Den e wikènt di 28 di òktober atrobe Kòrsou ta spanta di e di diesdos víktima di tráfiko di 2023. Outo a dal un dama di 32 aña di edat ku ker a krusa Schottegatweg Noord ku hopi tráfiko, i el a fayesé di su heridanan.
E no ta e promé persona ku a fayesé na eksaktamente e sitio ei: un aña promé tambe outo a dal un hende na pia mata ei.
Tráfiko peligroso
Ruiter ya tin añanan largu ta atvertí pa e situashon di tráfiko peligroso na Kòrsou. Anto espesialmente e pida serka e pòmp di gasolin na Schottegatweg Noord.
Na Kòrsou tin un promedio di trinta aksidente di outo pa dia. Ku un promedio di 15 pa 25 morto den tráfiko pa aña – ku un kantidat di habitante di 150.000 – Kòrsou ta pará haltu riba e lista mundial di World Health Organization (WHO).
“Aña pasá tambe nos tabata pará aki, despues ku outo a trapa un hende na pia ora ku e ker a krusa kaya. El a fayesé di su heridanan. E tabata e promé morto den tráfiko di aña 2022. Mas pió ta ku for di e tempu ei kaba mi a atvertí pa di dos bia pa e situashon peligroso di tráfiko.”
Reglanan di tráfiko
Segun minister Charles Cooper di Tráfiko, Transpòrt i Planifikashon Espasial (VVRP) no tin un situashon peligroso di tráfiko niun ora na Schottegatweg. “Tin hende sí ku no ta tene nan mes na e reglanan di tráfiko i ku ta trata di tuma ‘shortcut’ ku tur konsekuensia di esaki.”
Segun e minister hende na pia por krusa seif na un distansia di 50 meter di e pòmp di gasolin na e lus di tráfiko na haltura di Rio Frio.
Pakiko a subi e velosidat máksimo?
Segun e èks-polis mester drecha e maneho di tráfiko. “For di tempu ku na 2019 a subi e velosidat máksimo riba e karetera di reng pa 80 kilometer pa ora mi ta atvertí kaba pa e konsekuensianan di esaki.”
“A skohe pa esaki pasobra ta e kaminda grandi prinsipal”, e Direktor di Dienst Openbare Werken (DOW) Frensel Mercilia ta bisa. “Mester tin un divishon entre e kaminda prinsipal primario i e kamindanan prinsipal sekundario.”
Segun Mercilia sigur sigur a tene kuenta ku e infrastruktura rònt di e velosidat nobo i tur kaminda pa bùs baha velosidat pa yega na parada di bùs i oumentá velosidat pa subi kaminda bèk ta kumpli ku e normanan ku a stipulá.
‘Hende no ta para pa lus kòrá’
Si Mercilia ta rekonosé ku e situashon di tráfiko aktualmente no ta seif. “Niun hende krusa na e lusnan di krusa kaya. Serka e lusnan di tráfiko bo por krusa seif pasobra or e lusnan ei bira kòrá tur hende mester para.”
“Pero nos tin un fenómeno nobo na e isla: hende no ta para mas pa lus kòrá. Semper bo mester warda te ku tres pa kuater outo pasa den lus kòrá. Pues esei tambe ta hasi e krusamentu di kaya peligroso.”
Segun e direktor aktualmente no tin plan pa kambia e situashon di tráfiko riba e karetera rònt di siudat. “E úniko solushon lo por ta pa planta mata riba e partishon mei mei pa evitá ku hende por krusa kaya ei.”
P’esei e direktor ta konsehá ku bon mirá niun hende na pia no mester krusa e kaya yen di tráfiko ei mes.
