Kon tabata posibel ku konstrukshon di hospital CMC a kosta mas ku 200 mion florin èkstra? Èks parlamentario Melvin Cijntje no ta haña e investigashon parlamentario di esaki nesesario. Hustisia lo mester wak si polítiko mester paresé dilanti wes, e ta bisa.
E gastunan haltu di e hospital entre otro a pèrkurá pa un posishon di debe haltu di CMC. Pueblo di Kòrsou – e pagadó di impuesto – a bira víktima di esaki, Cijntje ta bisa. “Esnan kulpabel ta konosí masha tempu kaba.”
Parlamento di Kòrsou e lunanan binidero ku e ‘Tijdelijke Commisssie (Komishon temporario) Hòspital Nobo Otrobanda’ ta investigá kon e hòspital a kosta sigur 200 mion florin mas ku a planeá originalmente.
Diferente interogashon i dokumento
E komishon di enkuesta ke haña sa kon e tumamentu di desishon di esnan responsabel polítikamente a tuma lugá. Parlamento ta bai studia diferente interogashon i dokumento envolví.
Èks parlamentario pa e partido Pueblo Soberano Melvin ‘Mac’ Cijntje ta haña henter e komishon ‘sèn tirá afó’. E ta haña ku parlamento lo mester a manda un rapòrt di aña 2017 pa Ministerio Públiko, pa por persiguí e posibel kulpabelnan.
E rapòrt ku Cijntje ta referí na dje ta skibí pa e organisashon belga VK Architects na 2017. Segun e na 2016 e minister di Salubridat Públiko di e tempu ei Siegfried Victorina, ku a fayesé na òktober di e aña aki, a duna òrdu pa traha un rapòrt.
“Ei a sali ku e promé ministernan di e tempu ei, Ivar Asjes i Ben Whiteman ta responsabel polítikamente ku e gastunan planeá di 400 mion a subi bai 600 mion.” Segun e esei a sosodé a base di desishon no masha kla.
Hòspital riba e tereno na Nieuwe Haven
Cijntje ta splika ku e plan original pa traha un hòspital riba e tereno di Aqualectra na Nieuwe Haven tabata hopi mas simpel. “Despues a disidí di trah’é na Otrobanda i entre otro a bini tur sorto di piso èkstra aserka.”
“Asjes i Whiteman komo promé minister a tuma desishon robes tokante e konstrukshon di e hòspital tempu ku ami tabata miembro di e mesun partido. Pero esei no ta kita mi di pidi pa OM investigá e manera di hasi di nan dos.”
Cijntje di 2012 te 2017 tabata miembro di Staten di Kòrsou na nòmber di partido Pueblo Soberano. Despues di e asesinato di e lider di Pueblo Soberano Helmin Wiels riba 5 di mei 2013 Cijntje a bira presidente di frakshon. El a sali for di e partido despues ku èks promé minister Ben Whiteman na 2018 a bira lider di e partido.
Tur partido ta representá den e Komishon Temporario HNO
E Komishon Temporario HNO ta konsistí di seis parlamentario binidero di e seis frakshonnan ku ta den Staten: Michelangelo Martinez (KEM, Rennox Calmes (Trabou pa Kòrsou), Gwendell Mercelina (PNP), Ana- Maria Pauletta (PAR), Giselle McWilliam (MAN) i presidente Edward Braam (MFK). Un tim di spesialista ta sostené e komishon
A tene dos enkuentro públiko kaba (riba 2 di desèmber: meinta na Barber i atardi na Montaña Rei) i a start un enkuesta pa peilu opinion di pueblo tokante e trabounan di e Komishon Temporario HNO.
Tres investigadó sientífiko ta listra e dokumentonan i huntu ku e miembronan di e Komishon Temporario HNO ta determiná ken mester interogá.
Tin un grupo di skuchadó krítiko tambe ta traha, ku ta duna e Komishon Temporario HNO konseho. E grupo di skuchadó krítiko ta konsistí di Arjen Vliegenthart (direktor di Nibud), profesor Marcel Levi (presidente di NWO), profesor Rogier Lodewijks (derecho di estado i gobernashon) i profesor Eline van Altenburg-van den Broek (ekonomista di salubridat i epidemiólogo).
