Un nòmber di kaya ku ta nòmber di un almirante di West-Indische Comagnie? Imposbel, lo bo pensa. Tòg den Otrobanda históriko bo ta djis haña bo ta kana den Piet Heinstraat.
“Nò, un nòmber di kaya asina no ta pas mas den e tempu aki”, Arthur Curiel (76) ku a lanta den e bario aki ta haña. “Nos a sigui desaroyá, komo hende i komo pais. Mester kita e bòrchi ei.”
Curiel ta dosente di deporte. E gusta kompartí konosementu i eksperensia. Asina e ta pone un potrèt di e nòmber di kaya riba Facebook ku e teksto insitá: “Ta kiko Piet Hein ta buska den e bario aki?”
‘Nèt nada’, Jason Fullinck (40), presidente di e Plataforma Sklabitut i Herensia di Sklabitut ku a instalá e aña aki pa ministerio di kultura na Kòrsou.”Nos ke pa tur nòmber malu di e pasado kolonial bai for di riba kaya. Pasobra tin mas, manera Columbusstraat. Pero no ta asina fásil.”
Hende no tin un idea
Esei ta sali na 2011. Despues di hopi konmoshon i agreshon entre esnan pro i kontra e aña ei ta kambia e nòmber di Peter Stuyvesant College pa Kolegio profèsòr dòkter Alejandro ‘Jandie’ Paula (KAP). “Nos ta pensa ku por ta diferente si nos laga hende realisá pakiko e nòmbernan ei no por mas”, Fullinck ta bisa.
“Esei ta un proseso di konsientisashon i edukashon. Despues nos ta kambia tur e nòmbernan ei den un tiru.”
Ku si publikashon riba Facebook Arthur Curiel ta trata di lòs algu. “Kasi niun hende no ta kòrda ken tabata Piet Hein. Mi no ta kere niun ora ku mi por kambia mundu, pero mi ta spera ku hende lo kuminsá pensa tokante esaki.”
‘Bo no ta duna kriminal un pedestal’
Presidente di plataforma Fullinck no maha su kabes ku hende ku ta teme ku ku e nòmbernan di kaya un parti di historia ta bai pèrdí. E ta mira ku ta midi ku dos midí.
Si un hende tabata kulpabel den Segundo Giera Mundia mesora ta sigui akshon. Si ta trata di pasado di sklabitut, hopi bia e reakshon ta: ‘dje teribel e tampoko no tabata’.
“Semper a glorifiká historia kolonial”, Fullinck ta bisa. “Nos a kustumá ku esei. Pero un pueblo ku ta respetá su mes, no ta pone kriminal riba un pedestal.
‘Pakiko no Kaya Mafalda Miguel?’
Curiel regularmente ta kana keiru den e bario kaminda el a nase i lanta. E ta manehá grupo di Facebook “Otrobanda di nos pa nos’. “Aki tabata biba famia simpel. Bo tabata sinti bo berdaderamente konektá na otro. Na mucha semper mi tabata hasi deporte.”
Ta fásil pa haña un alternativa pa Piet Heinstraat. E meskla di un edukashon severo, bon enseñansa i deporte i muzik tabatin resultado. Den e bario di siudat hopi Yu di Kòrsou konosí a lanta: deportista, músiko, polítiko. Por ehèmpel e kantante Mafalda Miguel i hungadó di basketbòl di ántes Randy Wiel.
